Baldvin Z leikstýrir auglýsingum

Leikstjórinn Baldvin Z hefur verið ráðinn sem auglýsingaleikstjóri hjá framleiðslufyrirtækinu Sagafilm.

Frægðarsól Baldvins hefur verið afar hátt á lofti síðan kvikmynd hans Vonarstræti var frumsýnd fyrir stuttu. Hefur hún hlotið glimrandi dóma og hafa margir gefið Baldvini viðurnefnið Baltasar Z með vísan í leikstjórann Baltasar Kormák sem hefur átt góðu gengi að fagna vestan hafs að undanförnu.

Samkvæmt heimildum Fréttablaðsins mun Baldvin þó ekki aðeins leikstýra auglýsingum heldur takast á við leikið efni á næstunni en hvaða verk það er fæst ekki staðfest hjá Sagafilm en fyrirtækið hefur framleitt fjöldann allan af sjónvarpsseríum síðustu ár, svo sem Rétt, Ástríði, Vaktaseríuna, Pressu og Heimsenda.