Stjórnarráð Íslands undirritar Jafnréttissáttmála UN Women

Stjórnarráð Íslands undirritaði í dag yfirlýsingu um að fylgja Jafnréttissáttmála Sameinuðu þjóðanna um kynjajafnrétti og valdeflingu kvenna.

Þetta er í fyrsta sinn sem öll ráðuneyti eins ríkis undirrita þennan sáttmála í sameiningu. Jafnframt var undirritaður sáttmáli SÞ um samfélagslega ábyrgð. Þetta kemur fram á vef fjármála- og efnahagsráðuneytisins.

Undirritunin fór fram á opinni ráðstefnu UN Women á Íslandi, Festa og Samtaka atvinnulífsins á Hótel Nordica. 

Kristin Hetle, framkvæmdastjóri hjá UN Women í New York, sem var viðstödd ráðstefnuna, óskaði íslenskum stjórnvöldum til hamingju með að tileinka sér Jafnréttissáttmála UN Women og að staðfesta enn á ný forystuhlutverk Íslands í að stuðla að kynjajafnrétti.

Undirritun sáttmálanna fellur að þeirri stefnu íslenskra stjórnvalda að Ísland verði áfram í fararbroddi í jafnréttismálum en Ísland hefur skipað fyrsta sæti á lista Alþjóðaefnahagsráðsins (World Economic Forum) um jafnrétti kynjanna fimm ár í röð.