Flestir vilja mannúðlegar veiðar

Hvalveiðar 73 prósent Íslendinga telja mikilvægt að hvalveiðar séu mannúðlegar.

Þetta kemur fram í niðurstöðum skoðanakönnunar sem dýravelferðarsamtökin International Fund for Animal Welfare (IFAW) létu Capacent Gallup gera fyrir sig. Engar opinberar upplýsingar liggja fyrir um það hvort hvalveiðar við Ísland uppfylli þessa kröfu.

Í könnuninni kemur einnig fram að 59,3% aðspurðra telja að hvalveiðar við Ísland séu stundaðar á mannúðlegan hátt.

„Það er ljóst að Íslendingum er umhugað um velferð dýra. Því miður eru ekki til upplýsingar um það hvernig hvalveiðum við Íslandsstrendur er háttað svo almenningur geti tekið upplýsta afstöðu út frá þeim hvort veiðarnar séu mannúðlegar eða ekki,“ segir Sigursteinn Másson, talsmaður IFAW á Íslandi. Hann segir mikilvægt að opna umræðuna um þessa hlið hvalveiða. „Það er eðlileg krafa að íslenskir hvalveiðimenn veiti vísindamönnum og fjölmiðlum aðgang að hvalveiðiferðum sínum þannig að hægt sé að miðla óháðum upplýsingum um eðli hvalveiða milliliðalaust til almennings.“

Í tilkynningu frá IFAW kemur fram að við mat á því hvort veiðar séu mannúðlegar er annars vegar horft til þess hversu þróað taugakerfi þau hafa og hins vegar dauðatíma, þ.e. þess tíma sem líður frá því þau eru særð og þar til þau deyja. Engin alþjóðleg skilgreining er til á því hvað telst vera mannúðlegt við veiðar á villtum spendýrum. „Fyrir liggur að hvalir eru spendýr með háþróað taugakerfi sem þýðir að þeir finna fyrir sársauka og upplifa hræðslu með svipuðum hætti og mannfólk,“ segir í tilkynningunni.

Engar vísindalegar upplýsingar eru til um dauðatíma hvala í hvalveiðum við Ísland eða nokkrar aðrar upplýsingar um hvernig veiðarnar hafa áhrif á dýrin. Þetta kemur fram í nýlegu svari Sigurðar Inga Jóhannssonar, sjávarútvegs- og landbúnaðarráðherra, við fyrirspurn Árna Þórs Sigurðssonar þingmanns Vinstrihreyfingarinnar – græns framboðs á Alþingi. Í svarinu kemur einnig fram að til standi að Fiskistofa hefji mælingar á dauðatíma hvala við þær veiðar sem áætlaðar eru í sumar.