Sjónvörp á kömrunum í Brasilíu

„Þetta er búið að vera geðveikt, alveg ólýsanlegt“ segir Einar Þórmundsson, sem er nú staddur í Ríó De Janeiro í Brasilíu þar sem hann fylgist með heimsmeistarakeppninni í knattspyrnu ásamt þremur vinum sínum.

„Það eru allir að horfa á HM, fólk er með túbusjónvarp úti á götu til að fylgjast með mótinu. Þeir sem selja inn á kamrana eru með pínulítið sjónvarp til að geta fylgst með. Leigubílstjórar eru líka með sjónvarp í bílnum svo þeir geti horft á leikina á meðan þeir keyra“ segir Einar heillaður af mannlífinu.

Sáu fimm slagsmál í stúkunni

„Þegar Brasilíumenn spila er öllu lokað og haldið partý. Við horfðum á leik Chile og Brasilíu á hostelinu með fullt af Brössum.“ Það leit ekki vel út lengi vel fyrir Brasilíumenn, leikurinn fór í framlengingu og að lokum vítaspyrnukeppni. Einar segir heimamenn hafa farið á taugum.

„Þegar Brasilíumenn komust svo áfram trylltist allt, það hlupu allir út á götu til að fagna. Við þurftum sjálfir að hlaupa í gegnum mannfögnuðinn til að ná lest til að komast á leik Úrúgvæ og Kólumbíu.“

Leikurinn fór fram á hinum sögufræga Maracana-leikvangi.

„Þetta var besti leikurinn sem við fórum  á. Við sáum fimm sinnum slagsmál í stúkunni nálægt okkur á meðan leiknum stóð. Það var þvílíkur hiti í mönnum.“

Algjör steinsteypufrumskógur

Ferðalag strákanna hófst á þrettán daga ferðalagi á húsbíl um Bandaríkin.

„Við fórum til Los Angeles, Las Vegas og San Francisco, sáum meðal annars UFC bardaga í Las Vegas.“ Þaðan var ferðinni heitið til Sao Paulo í Brasilíu sem Einar segir vera furðulega borg. „Við vorum í þrjá daga í Sao Paulo. Þetta er algjör steinsteypufrumskógur.“

Einari líst mun betur á Rio De Janeiro.

„Borgin er hrikalega falleg og það er einfalt að læra á lestarkerfið og svoleiðis. Okkur hefur ekki fundist við vera í neinni hættu hérna. Það var búið að vara okkur við að við gætum lent í vandræðum en það hefur ekki verið. Það eru reyndar lögreglumenn út um allt út hérna út af HM.“