Algjör undantekning ef ferðamenn fá að greiða með reiðufé

„Við reynum að setja verkferla til að fyrirbyggja að lögreglumenn geti verið vændir um að misnota fé,“ segir Guðbrandur Sigurðsson, aðalvarðstjóri hjá umferðardeild lögreglunnar á höfuðborgarsvæðinu. Lögreglumaður á Seyðisfirði sætir rannsókn en hann liggur undir grun að hafa stungið sektargreiðslum frá erlendum ferðamönnum vegna hraðaaksturs í eigin vasa.

Líkt og Vísir fjallaði um fyrr í dag eru lögreglumenn úti á landi iðullega einir í bílum sínum. Því er oft enginn til vitnis um það sem fram fer en hljóð- og myndupptökubúnaður í bílunum á að hjálpa til við það. Rannsókn lögreglu miðar meðal annars að því að skoða upptökurnar nokkra mánuði aftur í tímann.

Aðspurður hvaða háttarlag sé haft þegar lögreglumenn sekti ökumenn fyrir of hraðan akstur segir Guðbrandur að lögreglumaður skrifi vettvangsskýrslu. Hún sé svo lesin yfir af viðkomandi ökumanni til staðfestingar um að hann sé samþykkur því sem haft er eftir honum. Því næst hefur viðkomandi val um hvort hann fái sektarboð sent eða greiði á staðnum, með kreditkorti. Ástæðan fyrir því sé aðallega ein.

„Markhópurinn er útlendingar til að missa þá ekki úr landi áður en þeir greiða sekt sína,“ segir Guðbrandur. Hins vegar stendur aðeins til boða að greiða með kreditkortum, ekki reiðufé.

„Það er ekki tekið við sektargreiðslum í beinhörðum peningum hjá LRH,“ segir Guðbrandur og telur víst að svo sé á landsvísu.

Algjör undantekning að greitt sé með reiðufé

Hermann Ívarsson, varðstjóri á Blönduósi, segir í samtali við Vísi að farið sé eftir sömu meginreglu á Blönduósi. Hann segir til í dæminu að sektir séu greiddar í reiðufé til að koma í veg fyrir að viðkomandi sleppi við að greiða sekt en það sé algjör undantekning.

„Fasta reglan er sú að tekið er við kortum eða þá reikningurinn sendur á heimili eða einkabanka,“ segir Hermann.

Guðbrandur segir aðstæður vissulega aðrar úti á landi en í borginni. Bíltúr á Kjalarnesi á lögreglustöðina taki kannski 25 mínútur. Í undantekningartilfellum séu umferðarlagabrjótar færðir á lögreglustöð á skrifstofutíma þar sem þeir geta greitt sekt sína í reiðufé. Lögreglumaður úti á landi getur hins vegar verið í 300 kílómetra fjarlægð frá starfsstöð sinni eins og þekkist á Vestfjörðum.

Um tvo ólíka þætti að ræða. Hlutverk lögreglu er að halda uppi lögum og reglum, fylla út skýrsluna og senda greiðsluseðil á viðkomandi. Svo sjái sektarmiðstöðin um að innheimta sektir. Sé viðkomandi farinn af landi brott verði svo að vera. Ekki sé lögð vinna í að hafa uppi á ökumönnunum erlendis. Þar spili inn í að Ísland sé ekki í Evrópusambandinu.

Auk þess verði að velta fyrir sér hve miklum fjármunum eigi að verja í að innheimta sekt upp á nokkra þúsundkalla. Hins vegar sé brotið þeim mun alvarlegra og sektin há þurfi að loka þeim málum og færa þá ferðamenn á lögreglustöð til að ganga frá málum. Sekt við hraðaakstri geti numið 100-150 þúsund krónum.