Welbeck: Frábær frammistaða hjá liðinu

Danny Welbeck var hetja enska landsliðsins í kvöld er hann skoraði bæði mörkin í 0-2 sigri Englands.

Það bjuggust ekki margir við miklu af enska landsliðinu í kvöld enda liðið mikið breytt. Liðið spilaði þó þrælvel.

"Við sköpuðum okkur mikið af færum í fyrri hálfleik þar sem síðasta sendingin var að klikka. Eftir að við náðum að skora þá tókum við stjórnina á leiknum. Þetta var frábær frammistaða hjá öllu liðinu," sagði Welbeck hógvær.

Landsliðsþjálfari Englands, Roy Hodgson, var eðlilega himinlifandi með sigurinn á liðinu sem hann eitt sinn stýrði.

"Við uppskárum eins og við sáðum í þessum leik. Við pressuðum og eftir fyrra markið áttum við leikinn. Við getum enn bætt okkur," sagði Hodgson.