Íslenski boltinn

Uppbótartíminn: Enginn Evrópublús hjá Stjörnunni | Myndbönd

Stjarnan og KR mættust í frábærum leik.
Stjarnan og KR mættust í frábærum leik. Vísir/Stefán
Átjánda umferð Pepsi-deildar karla fór fram í gær. Hverjir áttu góðan dag og hverjir áttu erfiðan dag? Hvað segir tölfræðin og hver var umræðan á Twitter? Vísir gerir hér upp umferðina á léttum nótum.

FH og Stjarnan unnu bæði sína leiki og eru enn ósigruð á toppi deildarinnar. Fram vann mikilvægan sigur á Keflavík og hafði sætaskipti við Fjölni sem er kominn í fallsæti. Þórsarar halda áfram að tapa, en Valsmenn unnu ÍBV eftir þrjá tapleiki í röð.

Umfjöllun og viðtöl úr öllum sex leikjum umferðarinnar:

KR - Stjarnan

FH - Fjölnir

Breiðablik - Fylkir

Valur - ÍBV

Þór - Víkingur

Keflavík - Fram

Valsmenn, með fagurskeggjaðan Þórð Steinar Hreiðarsson í forgrunni, fagna marki gegn ÍBV.Vísir/Stefán
Góð umferð ...

... Stjörnuna

Stjörnumenn máttu þola stórtap gegn Inter á San Siro á fimmtudaginn og mættu í Vesturbæinn án dönsku varnarmannanna Nicklas Vemmelund og Martin Rauschenberg. Þrátt fyrir að þrír af fjórum í varnarlínu Garðarbæjarliðsins í leiknum væru ekki að spila sínar venjulegu stöður og liðið hafi endað leikinn með þrjá 19 ára stráka inn á unnu Stjörnumenn gríðarlega sterkan sigur á KR-liði sem hafði verið á góðri siglingu á undanförnum vikum.

... FH

FH-ingar voru í hlutlausum gír í fyrri hálfleik, en þeir gáfu í í þeim seinni og unnu að lokum öruggan 4-0 sigur á Fjölni. Þetta var þriðji sigur FH-inga í röð og þeir hafa ekki enn tapað leik í deildinni. FH hélt einnig hreinu enn eina ferðina, en liðið hefur aðeins fengið á sig 11 mörk í 17 leikjum.

... Fram

Framarar gerðu góða ferð til Keflavíkur og unnu sinn þriðja sigur í síðustu fimm leikjum. Keflvíkingar leiddu í hálfleik með marki Harðar Sveinssonar, en lærisveinar Bjarna Guðjónssonar komu sterkir til leiks í seinni hálfleik. Hafsteinn Briem, Aron Bjarnason, Jóhannes Karl Guðjónsson og Guðmundur Steinn Hafsteinsson skoruðu sitt markið hver og tryggðu Fram gríðarlega mikilvægan sigur.

Vond umferð fyrir ...

... Keflavík

Keflvíkingar eru komnir í virkilega slæm mál eftir 2-4 tap fyrir Fram á heimavelli. Lærisveinar Kristjáns Guðmundssonar hafa aðeins unnið einn af síðustu 15 deildarleikjum sínum og það er fátt sem bendir til að þar verði breyting á. Keflavík er nú aðeins þremur stigum frá fallsæti.

... Fjölni

Fjölnismönnum gengur álíka illa að vinna fótboltaleiki og Keflavík og eftir tapið gegn FH í gær eru þeir komnir í fallsæti. Ágúst Gylfason og hans menn eru í miklum vandræðum, en Fjölnir hefur aðeins unnið einn sigur í síðustu 16 deildarleikjum. Fjölnir á næst leik gegn Fram sem er algjör úrslitaleikur fyrir Grafarvogsliðið.

... Abel Dharia

Úgandamaðurinn gerði sig sekan um fáránleg mistök þegar hann missti fyrirgjöf Magnúsar Más Lúðvíkssonar beint fyrir fætur Hauks Pál Sigurðssonar, fyrirliða Vals, sem setti boltann í autt markið. Ekki fyrsta markið sem Abel gefur mótherjum ÍBV í sumar.

Heimir Guðjónsson og lærisveinar hans eru með tveggja stiga forystu á toppi Pepsi-deildarinnar.Vísir/Stefán
Tölfræðin:

*Jonathan Glenn, markahæsti leikmaður Pepsi-deildarinnar, er ekki búinn að skora á síðustu 549 mínútum sem hann hefur spilað upp á landi.

*Valsmenn héldu marki sínu hreinu í fyrsta sinn síðan 22. júní en þeir voru búnir að fá á sig mark í átta leikjum í röð.

*Chukwudi Chijindu bíður enn eftir sínu fyrsta markið í Pepsi-deildinni í sumar en þerra var hans sjöundi leikur í deildinni í sumar. Chuck er nú búinn að spila í 603 mínútur án þess að skora.

*Þetta er í fyrsta sinn síðan sumarið 1981 þar sem Víkingar vinna báða leikina við Þór í efstu deild. Þá varð Víkingur meistari en Þór féll.

*Víkingar hafa ekki skorað í fyrri hálfleik í sex síðustu leikjum sínum í Pepsi-deildinni.

*KR var fyrir leikinn búið að spila 21 leik í röð í deild (18) og bikar (3) á KR-vellinum án þess að tapa (19 sigrar og 2 jafntefli).

*Stjarnan varð fyrsta liðið til að vinna KR á KR-vellinum í Pepsi-deildinni síðan að Blikar afrekuðu það 16. september 2012.

*Stjörnumenn voru undir í hálfleik í fyrsta sinn síðan 27. júní þegar þeir unnu 2-1 endurkomusigur á Fram. Þetta eru einu tveir leikirnir sem Stjarnan hefur verið undir í hálfleik í Pepsi-deildinni í sumar.

*Stefán Logi Magnússon, markvörður KR, fékk á sig þrjú mörk í fyrsta sinn í Pepsi-deildinni í sumar.

*Keflvíkingar hafa ekki unnið í síðustu 7 deildarleikjum sínum á Nettó-vellinum í Keflavík (3 jafntefli og 4 töp).

*Áttundi leikurinn í Pepsi-deildinni í sumar sem Keflavík missir forystu niður í jafntefli eða tap.

*Fram skoraði jafnmikið í sigrinum í Keflavík og í sjö deildarleikjum liðsins þar á undan.

*Breiðablik jafnaði met KR frá 1982 með því að gera sitt 11. jafntefli í Pepsi-deildinni í sumar.

*Breiðabliksliðið hefur aðeins tapað 2 af fyrstu 12 deildarleikjum sínum undir stjórn Gumma Ben.

*Fylkir voru yfir í hálfleik í fimmta leiknum í röð í Pepsi-deildinni. Markatalan fyrir hlé í þessum fimm leikjum 7-1.

*Blikar eru þrisvar sinnum búnir að fá á sig jöfnunarmark á síðasta stundarfjórðungnum í síðustu fjórum leikjum sínum í Pepsi-deildinni.

*Róbert Örn Óskarsson hélt FH-markinu hreinu í 9. sinn í Pepsi-deildinni í sumar.

*Ingimundur Níels Óskarsson hefur bara skorað fyrsta mark FH í þeim fjórum leikjum sem hann hefur skorað í sumar.

*Fjölnir hefur tapað sex útileikjum í röð í Pepsi-deildinni og fengið á sig fjögur mörk í þremur þeirra.

KR-ingar töpuðu í fyrsta sinn á heimavelli frá því í september 2012.Vísir/Stefán
Skemmtilegir punktar úr Boltavaktinni:

Guðmundur Marinó Ingvarsson á Kópavogsvelli

„Það er svo langt síðan Fylkir átti útileik að stuðningsmenn liðsins fóru víst allir í Lautina. Þess vegna eru nánast bara Blikar í stúkunni.“

Anton Ingi Leifsson á Kaplakrikavelli

„Það er rosa stór og fyndinn Adidas-bolti á miðjunni, en ég veit ekkert hvaða tilgangi hann þjónar.“



Hæstu og lægstu einkunnir umferðarinnar:

Pablo Punyed, Stjörnunni - 8

Ólafur Karl Finsen, Stjörnunni - 8

Steven Lennon, FH - 8

Atli Guðnason, FH - 8

Andri Ólafsson, ÍBV - 3

Umræðan #pepsi365

Atvik 18. umferðar Leikmaður 18. umferðar Mark 18. umferðar Markasyrpa úr 18. umferð
Pepsi Max-deild karla

Mest lesið


Fleiri fréttir

Sjá meira


×

Mest lesið