UFC 175: Tveir titilbardagar í nótt

Í nótt fara tveir titilbardaga fram á UFC 175. Bardagakvöldið fer fram í Las Vegas í Bandaríkjunum og hefst útsendingin kl 2 á Stöð 2 Sport.

Chris Weidman (11-0) gegn Lyoto Machida (21-4) - titilbardagi í millivigt (84 kg)

Chris Weidman hefur titil að verja gegn Lyoto Machida í aðalbardaga kvöldsins. Eftir að hafa sigrað eina mestu goðsögn í MMA, Anderson Silva, tvisvar með óvenjulegum hætti eru enn einhverjir ekki sannfærðir um að Weidman sé verðugur meistari. Hann fær nú tækifæri til að sýna og sanna að hann sé verðugur meistari.

3 atriði til að hafa í huga

• Frábær glímumaður og hefur aldrei verið tekinn niður í MMA
• Æfir hjá Matt Serra og Ray Longo en Serra er fyrrum veltivigtarmeistari UFC
• Fyrsti maðurinn í 7 ár til að sigra Anderson Silva

Lyoto Machida er þekktur fyrir skemmtlegan karate stíl í bardögum sínum. Þessi óvenjulegi stíll og frábær felluvörn skilaði honum léttþungavigtartitilinum árið 2009. Hann var ekki lengi meistari og færði sig niður í millivigt í fyrra þar sem hann hefur litið afar vel út. Sigri hann titilinn í nótt verður hann aðeins þriðji maðurinn í sögu UFC til að verða meistari í tveimur þyngdarflokkum.

3 atriði til að hafa í huga

• Fær sjaldan högg á sig
• Með 83% felluvörn í UFC
• Treystir á gagnhöggin sín og brellur

Ronda Rousey (9-0) gegn Alexis Davis (16-5) - titilbardagi í bantamvigt kvenna (61 kg)

Ronda Rousey er ein skærasta stjarnan í UFC í dag og verður þetta fjórða titilvörn hennar í UFC. Hún hlaut bronsverðlaun í júdó á Ólympíuleikunum árið 2008 og er júdó hennar í heimsklassa. Hún hefur bætt boxið sitt mikið á undanförnu en hún sigraði fyrstu átta bardaga sína eftir „armbar“.

3 atriði til að hafa í huga

• Er Hollywood ferill Rousey að trufla bardagaferilinn?
• Sigraði Sara McMann síðast eftir tæknilegt rothögg, hennar fyrsta á ferlinum
• Hefur sigrað alla bardaga sína nema 1 í 1. lotu

Alexis Davis er svart belti í brasilísku jiu-jitsu og með mikla reynslu. Hún er eitilhörð af sér en nánast enginn hefur trú á að hún eigi roð í meistarann. Það skal þó enginn afskrifa Davis sem er í 2. sæti á styrkleikalista UFC í þyngdarflokkinum.

3 atriði til að hafa í huga

• Er ekki með góða felluvörn
• Hefur sigrað 7 bardaga eftir uppgjafartök
• Hefur barist sem atvinnumaður frá 2007