Kjartan Henry vallarþulur á KR-vellinum

„Það var Grétar Sigfinnur Sigurðarson sem skoraði mark KR,“ tilkynnti Kjartan Henry Finnbogason áhorfendum á KR-vellinum í kvöld. Kjartan Henry tók út leikbann í 1-0 sigrinum gegn Fylki í kvöld í áttundu umferð Pepsi-deildar karla. Kjartan fékk rautt spjald í 2-1 tapinu gegn Stjörnunni í síðustu umferð.

Hann fylgdist með sínum mönnum úr stúkunni og kíkti í heimsókn í blaðamannastúkuna snemma í síðari hálfleik í leit að kaffi. Kjartan staldraði stutt við en tímasetti heimsóknina vel því Grétar Sigfinnur skoraði eina mark leiksins meðan hann fyllti bollann af kaffi.

Kjartan var fljótur að hugsa, fékk hljóðnemann frá vallarþulnum og vini sínum Hlyni Valssyni, og tilkynnti áhorfendum um markaskorarann. Var greinilegt að margir könnuðust við röddina því hinir sömu sneru sér við í stúkunni til að fá grun sinn staðfestan.