Þingmennskan ýfði upp exem Jóns Þórs

Eins og fram hefur komið herjar myglusveppur á híbýli Alþingis. Þingmenn Pírata þurftu að flýja skrifstofur sínar vegna myglusvepps og hópur starfsmanna Alþingis hefur glímt við heilsufarsvanda vegna myglusvepps í húsnæði Alþingis. Jón Þór Ólafsson Pírati hefur fengið að kenna á myglusveppnum, sem er lúmskur fjandi við að eiga.

„Já, heldur betur. Myglan eitrar og eitrunaráhrifin koma fram með mismunandi hætti. Það sem er veikt hjá fólki er líklegast til að brotna. Það er það sem er svo lúmskt – áhrifin koma fram með svo mismunandi hætti,“ segir Jón Þór sem sjálfur hefur fengið að kenna á eitrunaráhrifum og rekur það til húsnæðis Alþingis; híbýla og íverustaða þingmanna.

„Já, við fengum efstu hæðina undir skrifstofur að Austurstræti 14. Og ég tók eftir því þegar ég fór í páskahlé og var ekkert á skrifstofunni, að exem sem ég var byrjaður að fá og var farið að gruna að tengdist húsnæðinu sem ég fór ekki að nota fyrr en eftir alþingiskosningarnar, það fór að hjaðna.

Margir starfsmenn þingsins kannast við eiturnaráhrif myglusveppsins.

„Aðstoðarmaður okkar þingsflokks Pírata, Aðalheiður Ámundadóttir, var farin að fá öndunartruflanir. Hana var farið að gruna að þær tengdust skrifstofunni og myglunnar sem við töldum að væri þar. Birgitta Jónsdóttir og Helgi Hrafn Gunnarsson hafa ekki fundið fyrir neinum svona sterkum einkennum. En það er einmitt málið. Þetta er svo lúmskt og kemur fram með mismunandi hætti hjá fólki.“

Jón Þór segir einkennin með ýmsum hætti. Hann ráðleggur fólki að fara inn á vef Húsa og heilsu. Þar má finna nánari upplýsingar um myglusvepp og áhrif hans á heilsu manna. Jón Þór segir að sem betur fer sé fólk að vakna til vitundar um hversu lúmsk og skæð áhrif eitrunar myglusveppsins séu.