Time mælir með Secret Solstice-hátíðinni

Bandaríska tímaritið Time Magazine birti nýverið lista yfir fjórtán tónlistarhátíðir sem að blaðið mælir með fyrir lesendur. Á listanum eru stórar hátíðir á borð við Glastonbury, Sasquatch! og síðan íslenska tónlistarhátíðin Secret Solstice Festival.

Í textanum skrifar blaðamaður Times að hér á landi þurfi miklar skemmtanir til að drepa tímann þar sem sólin skíni allar klukkustundir sólarhringsins. ,,Til þess að hjálpa til við að drepa tímann þá býður Secret Solstice upp á upprennandi tónlistarmenn bæði frá Íslandi og hvaðanæva úr heiminum,'' 

Þetta er hins vegar ekki í fyrsta sinn sem að hátíðin lendir á lista yfir áhugaverðar tónlistarhátíðir en Secret Solstice lenti í áttunda sæti á tónlistarvefnum Pigeons and planes í grein um 25 tónlistarhátíðir sem ekki má missa af áður en þú deyrð. 

Þetta er í fyrsta sinn sem að Secret Solstice-hátíðin er haldin og því mikill heiður fyrir aðstandendur hennar að fá meðmæli frá einu stærsta tímariti heims en eins og Vísir hefur áður greint frá þá fer hátíðin fram í Laugardalnum daganna 20.-22. júní og státar hátíðin nokkrum af stærstu nöfnum tónlistargeirans í dag.

Meðal þeirra tónlistarmanna sem hingað koma eru meðal annars Massive Attack, Schoolboy Q, Woodkid, Disclosure, Banks og svo lengi mætti telja.