„Það var allt bundið hér í klíku og menn gátu gengið að auðsæld vísri“

„Fólk var hér áður fyrir ekki metið á eigin verðleikum og þannig var Ísland, hið fullkomna andverðleika samfélag á margan hátt,“ segir Árni Páll Árnason, formaður Samfylkingarinnar, í þættinum Mín skoðun á stöð 2 í dag.

„Það var allt bundið hér í klíku og menn gátu gengið að auðsæld vísri ef þeir voru í rættum flokkum og þekktu réttu mennina.“

Árni segist hafa haft mjög sterka skoðun á þjóðmálum frá tíu ára aldri.

„Ég hef alltaf hrifist af þessari hugmynd að reyna einhvernvegin að bæta samfélagið sem maður lifir í og mér hefur alltaf fundist hún heillandi.“

Árni segir að hrunið hafi haft þau áhrif að það jarðtengdi stjórnmálin á nýjan leik.

„Að vera í þannig stöðu að þurfa taka ákvarðanir sem varða velsæld og lífsafkomu fólks á tímum sem eiga sér ekki hliðstæðu um áratuga skeið, það auðvitað veldur því að maður allt í einu áttar sig á því að allt þetta gamla þras skiptir engu máli.“

Árni segir að það sem skipti máli er að stjórnmálin séu staðurinn sem maður geti haft grundvallaráhrif.

„Þegar ég var kosin á þing árið 2007 þá vissi enginn hver ég var og enginn hafði áhuga á þingmönnum. Síðan eftir hrunið þá sá maður hvernig viðhorf fólks breyttist og allt í einu áttaði maður sig á því að þegar allt hrynur þá er það einu sinni lýðræðið sem verður að standa undir þessu og hinir lýðræðiskjörnir fulltrúar verða að standa undir ábyrgðinni.“

Árni segir að seint á ferlinum hafi hann talið að ESB væri lausnin.

„Ég taldi EES lengi vel geta dugað okkur og ég hef stöðugt verið tilbúinn til endurmats á þessum sjónarmiðum. Ég er markaðshyggjumaður í þeim skilningi að ég trúi því að frjálsir markaði séu best til þess fallnir að skapa verðmæti. Hugmyndin um að hafa öflugt ríkisvald sem styður við frjálsan markað og tryggi frjálsa samkeppni og dreifi síðan arðinum til að tryggja félagslegt réttlæti sé rétta leiðin áfram.“

Formaðurinn segir að það sé mjög mikilvægt að það fjölgi alþjóðasinnuðu fólki á Íslandi.

„Ég sé það núna að allir hinu fjölmörgu kjósendur Sjálfstæðisflokks og Framsóknaflokks sem aðhyllast opið land og frjálst markaðshagkerfi og félagslegt réttlæti eiga engan þingmann núna."

Árni segir að þingmennirnir haldi kjósendum í gíslingu.

„Ég held að það skipti miklu máli að á alþingi Íslendinga aukist hlutur frjálslyndra alþjóðasinnaðra afla.“

Hægt er að sjá viðtalið við Árna Páll í heild sinni hér að ofan.