Stuðningur við ríkisstjórnina minnkar um fimm prósentustig milli mánaða, en rúmlega 37% þeirra sem tóku afstöðu segjast styðja hana nú og mælist stuðningur við stjórnina minni en samanlagt fylgi stjórnarflokkanna en þetta kemur fram í nýjasta Þjóðarpúlsi Gallup.

Litlar breytingar eru á fylgi flokka milli mánaða. Helstu breytingar eru þær að fylgi Framsóknarflokksins minnkar um tvö prósentustig en rúmlega 13% segjast myndu kjósa flokkinn nú.

Að sama skapi eykst fylgi Bjartar framtíðar um tvö prósentustig milli mánaða en tæplega 18% segjast myndu kjósa flokkinn nú. Fylgi annarra flokka breytist lítið eða á bilinu 0,1-0,8 prósentustig milli mánaða.

Rösklega 24% segjast myndu kjósa Sjálfstæðisflokkinn, tæplega 17% Samfylkinguna, rúmlega 12% Vinstrihreyfinguna - grænt framboð og rúmlega 9% Pírata færu kosningar til Alþingis fram nú. Tæplega 7% segjast myndu kjósa aðra flokka en nú eiga sæti á Alþingi.

Rúmlega 10% taka ekki afstöðu eða neituðu að gefa hana upp og tæplega 11% segjast myndu skila auðu eða ekki kjósa ef kosið yrði til Alþingis í dag.