Ofbeldi með stuðningi yfirvalda

Olga Bogomolets læknir og einn leiðtoga andófsmanna á Maidan torgi, sem nú hefur boðið sig fram til embættis forseta Úkraínu, sagði í fréttum okkar í gær að almenningur krefðist þess að þeir sem stóðu fyrir fjöldamorðunum á torginu yrðu þefaðir uppi og leiddir til saka.

Zoryan Kis, starfsmaður Amnesty International í Úkraínu, hefur orðið vitni að ótal ofbeldisverkum og jafnvel aftökum á mótmælendum í Úkraínu af hendi lögregluyfirvalda. Hann segir ofbeldið nú beinast gegn þeim sem mótmæli rússneskum yfirráðum á Krímskaga.

„Fólk er elt, því er rænt og þarf að þola ofsóknir og njósnir. Þetta er hræðilegt. Rússnesk lög tóku gildi á Krímskaga um leið og ráðamenn lögðu svæðið undir sig og rússnesk lög eru miklu strangari.“

Meðfylgjandi myndskeið eru voru tekin af blaðamönnum við mótmæli í Úkraínu síðastliðinna vikna. Þó myndirnar séu sönnunargögn um gegndarlaust ofbeldi og niðurlægingu af hálfu lögreglu hefur enginn úr þeirra röðum verið látinn svara til saka fyrir gjörðir sínar. Zoryan segir afar mikilvægt að óháð rannsókn fari fram. En hver á að framkvæma slíka rannsókn?

„Það er góð spurning. Það er augljóslega ekki nógu góðar aðstæður innanlands í Úkraínu núna til að láta rannsaka það sem þarna hefur ferið fram. Við vonumst sannarlega eftir utanaðkomandi aðstoð frá alþjóðasamfélaginu.“

Hann segist vita til þess að einhverjir alþjóðlegir aðilar séu byrjaðir að aðstoða við rannsókn málsins, þeirra á meðal bandaríska alríkislögreglan.

„Það er mjög mikilvægt að þetta verði áfram forgangsverkefni ríkisstjóranarinnar, að komast til botns í því hverjir hafi gengið fram með þessum hætti og hverjir hafi fyrirskipað og lagt blessun sína yfir það.“

Zoryan segir þá hermenn sem ofbeldinu beiti hafa verið skipulagða og vera að framfylgja skipunum að ofan.

„Það voru herforingjar viðstaddir þessa atburði en þeir gáfu engar skipanir um að hermennirnir ættu að láta af ofbeldisverkunum. Við vitum fyrri víst að við mótmælinn 18. Febrúar fengu hermennirnir skipun um að rýma torgið og það þýðir einfaldlega að ryðja burtu öllum sem þar voru.“