Freista þess að mæla stærð vestangöngu loðnunnar

Hafrannsóknastofnun ætlar að senda rannsóknaskip til að freista þess að mæla stærð vestangöngu loðnunnar, sem óvænt fannst út af Ísafjarðardjúpi í fyrradag. Sjómenn líkja ástandinu á miðunum við alvöru loðnuvertíð.

Góð loðnuveiði var úr þessari óvæntu göngu í gær og eru þónokkur skip á landleið með afla, en önnur bíða á miðunum eftir því að loðnan verði veiðanleg upp úr hádegi eins og í gær.

Grétar Rögnvarsson skipstjóri á Jóni Kjartanssyni SU sagði í viðtali við fréttastofuna í morgun að skipin væru stöðugt að finna nýjar og stórar torfur og hafi sum skipanna fengið mjög stór köst í gær, eða eins og á alvöru loðnuvertíð.

Þessi loðna er heldur smærri en sú sem gekk hefðbundna hringleið um landið og er nú farin að hrygna á Breiðafirði.

Hafrannsóknastofnun eru nú að undirbúa Bjarna Sæmundsson til loðnuleitar, og heldur skipið frá Bíldudal vestur á miðin síðdegis eða í kvöld til að reyna að meta þessa óvæntu göngu, sem gæti þýtt að bætt verði við kvótann á vertíðinni.

Hann er liðlega 130 þúsund tonn, en ekki er búið að veiða nema ríflega helming af honum.