Foreldrar keyra börnin meira en áður

Maður reyndi að tæla barn í bíl í grennd við Laugarnesskóla í gær. Þetta er í fjórða sinn á tveimur mánuðum sem reynt er að tæla barn í bíl í hverfinu. Sigríður Dagmar Jóhannsdóttir, Formaður foreldrafélags skólans segir foreldra keyra börn í meira mæli en áður.

„Ég hef heyrt að foreldrar séu farnir að keyra meira. Að skutla og sækja börn svo þau þurfi ekki að ganga langar leiðir og þá sérstaklega í myrkri. Ég er farin að gera það sjálf,“ segir Sigríður.

„Foreldrar eru mjög áhyggjufullur og þetta var tekið upp á stjórnarfundi félagins og hefur líka verið tekið upp í skólaráði. Við sem foreldrar getum lítið annað gert en að þrýsta á yfirvöld og krafist úrbóta. Lögreglan er að vakta skólann í auknu mæli og svæðið í kring og aukin gæsla er í frímínútum.“

„Foreldrafélagið tók þetta upp á stjórnarfundi í lok janúar. Þar komu alls konar hugmyndir fram um hvernig mætti bregðast við. Við getum í raun gert lítið annað en að beita þrýstingi á til dæmis Reykjavíkurborg.“

Á fundinum komu upp hugmyndir um að setja upp myndavélar á skólalóðinni og við skólann. „Einnig komu upp hugmyndir um að fá aukna gæslu og við vitum að lögreglan er með aukið eftirlit við skólann. Þeir keyra oftar í gegnum kerfið en venjulega. Það er þó á skólatíma og ég veit að síðustu tvö atvik gerðust eftir að skóla lauk.

Börnin sem um ræðir hafa ekki getað gefið upp frekari upplýsingar en um hvort karl eða konu sé að ræða og um lit bílsins. „Það er ekkert hægt að gera nema viðkomandi sé gripinn glóðvolgur, eða ef hann næðist á myndavélar. Þá væri lögreglan með bílinn og númer viðkomandi. Þær hafa einnig ákveðinn fælingarmátt.“

Foreldrafélagið mun funda aftur í lok febrúar þar sem meðal annars verður rætt um þessi atviki og hvernig hægt væri að sporna gegn þeim. „Ef foreldrar hafa hugmyndir um aðgerðir þá eru póstföng okkar í félaginu á heimasíðu félagsins. Það er um að gera að hafa samband við okkur og mæta á fund félagsins.“