"Ég hefði sætt mig við að tapa lýðræðislega en ekki svona“

„Ef maður eða kona með meiri reynslu af bæjarpólitíkinni og öðrum störfum hefði lent í fyrsta sætinu þá hefði ég mögulega sætt mig við þriðja sætið,“ segir Pétur Ólafsson í samtali við Vísi.

Pétur sóttist eftir að leiða lista Samfylkingarinnar í bæjarstjórnarkosningunum sem framundan eru í Kópavogi.  Hann hlaut ekki náð fyrir augum uppstillingarnefndar sem birti niðurstöður vinnu sinnar í gærkvöldi.

Meðal þeirra sem lýst hafa óánægju sinni eru Margrét Júlía Rafnsdóttir og Pétur en þau sóttust bæði eftir fyrsta sæti listans. Uppstillingarnefndin bauð Margréti að skipa níunda sæti listans og Pétri það þriðja sem þau höfnuðu bæði.

Pétur segist vera vonsvikinn með vinnu nefndarinnar en tekur þó fram að hin meinta vargöld sem ríki innan flokksins sé fyrst og fremst meðal þeirra sem ekki hlutu náð fyrir augum uppstillingarnefndarinnar.  

Tillögur nefndarinnar voru samþykktar með miklum meirihluta, með rúmlega 50 atkvæðum gegn 22. Pétur er þeirrar skoðunar að uppstillingarfyrirkomulagið sé meingallað og hvað þurfi mikið til að fella tillögur nefndanna sem iðulega eru skipaðar af stjórnum flokkana.



„Uppstilling er agaleg leið til að velja fólk á lista, þar sem flokksfélagar stilla upp hvor öðrum, enda kaus ég með prófkjöri á fundi í nóvember,“ segir Pétur. Hann bætir við að með uppstillingu séu meiri líkur á særindum meðal flokksmanna.

„Ég hefði sætt mig við að tapa lýðræðislega en ekki svona.“  

Aðspurður hvers vegna hann hafi ekki þegið boð nefndarinnar um að skipa þriðja sæti listans segir Pétur hafa tekið það til athugunar en að lokum hafnað því. Hann hafi einfaldlega ekki getað sætt sig við útnefningar nefndarinnar í sætin fyrir ofan hann.

Pétri þótti miður að hafa ekki fengið að setjast niður með uppstillingarnefndinni til að ræða framtíðarásýnd flokksins eftir að niðurstöðurnar lágu fyrir. Hann er þeirrar skoðunar að flokkurinn þurfi að stilla upp öðrum prófíl fyrir kosningarnar í vor.