„Jöfn kynjaskipting í fyrstu sex sætunum“

Þrír karlar skipa efsta sæti á framboðslista Sjálfstæðisflokksins fyrir borgarstjórnarkosninharnar í vor. Nýr oddviti flokksins í Reykjavík segir að þrátt fyrir það sé jafnt kynjahlutfall í efstu sætum og á listanum í heild.

Halldór Halldórsson skipar fyrsta sæstið, Júlíus Vífill Ingvarsson annað sætið, Kjartan magnússon verður í þriðja sæti, Áslaug María Friðriksdóttir í fjórðasæti, Hildur Sverrisdóttir í því fimmta og Marta Guðjónsdóttir skipar sjötta sætið.

Halldór Halldórsson, oddviti Sjálfstæðimanna í Reykjavík segir ekki erfitt að leggja af stað í kosningabaráttu með þennan lista þrátt fyrir háværa gagnrýni á uppröðun listans.

„Nei, það er ekki erfitt. Þetta er náttúrulega niðurstaðan úr prófkjöri þar sem fimm þúsund manns tóku þátt. Hins vegar er alltaf æskilegt að það sem jöfnust kynjaskipting. Mér finnst það skipta máli og ég held að öllum finnist það skipta máli. En svona raðaðist prófkjörið og fulltrúaráðið sá ekki ástæðu til að breyta því," segir Halldór.

„En ertu fylgjandi því að það sé stillt upp samkvæmt svokölluðum fléttulista?"

„Ég hef alltaf sagt það í þessu samhengi að ég tel að við séum að fara í rétta átt í þessu. En mér finnst mikilvægt að við tökum umræðu um það hvort að þær aðferðir sem við erum að nota í dag séu nógu góðar."

Halldór segir að þrátt fyrir allt sé hlutfallið á milli karla og kvenna á listanum í jafnvægi.

„Ég bendi á ef við tökum fyrstu sex sætin þá er jöfn kynjaskipting. Ef við tökum listann í heild sinni þá er jöfn kynjaskipting."

„En er það ekki frekar ódýrt að tala um jafna kynjaskiptingu á listanum þegar þrír karlmenn eru í fyrstu þremur sætunum?"

„Eins og ég sagði þá er æskilegt að það sé sem jöfnust kynjaskipting. Ég bendi bara á þá staðreynd að í fyrstu sex sætunum er jöfn kynjaskipting," segir Halldór.

Listann skipa fimmtán karlar og fimmtán konur, þar af fimm karlar og fimm konur í tíu efstu sætunum. Jórunn Frímannsdóttir Jensen, hjúkrunarfræðingur og fyrrum varaborgarfulltrúi skipar heiðurssæti listans.



Listinn er eftirfarandi:

1. Halldór Halldórsson, formaður Sambands íslenskra sveitarfélaga
2. Júlíus Vífill Ingvarsson, borgarfulltrúi          
3. Kjartan Magnússon, borgarfulltrúi          
4. Áslaug María Friðriksdóttir, borgarfulltrúi          
5. Hildur Sverrisdóttir, borgarfulltrúi          
6. Marta Guðjónsdóttir, kennari og fyrsti varaborgarfulltrúi 
7. Börkur Gunnarsson, blaðamaður, rithöfundur og leikstjóri        
8. Björn Gíslason, slökkviliðsmaður & varaborgarfulltrúi      
9. Lára Óskarsdóttir, stjórnendamarkþjálfi & kennari                 
10. Herdís Anna Þorvaldsdóttir, framkvæmdastjóri        
11. Björn Jón Bragason, sagnfræðingur       
12. Elísabet Gísladóttir, formaður íbúasamtakanna í Grafarvogi og lýðheilsufræðinemi                                                                              
13. Örn Þórðarson, ráðgjafi & fyrrv. sveitarstjóri                       
14. Íris Anna Skúladóttir, skrifstofustjóri       
15. Ólafur Kr. Guðmundsson, framkvæmdastjóri / Varaformaður FÍB    
16. Hjörtur Lúðvíksson, málari                        
17. Guðlaug Björnsdóttir, deildarstjóri & formaður samninganefndar     
18. Hulda Pjetursdóttir, viðskiptafræðingur       
19. Sigurjón Arnórsson, alþjóðlegur viðskiptafræðingur     
20. Jórunn Pála Jónasdóttir, laganemi                 
21. Viðar Helgi Guðjohnsen, lyfjafræðingur
22. Sigrún Guðný Markúsdóttir, framkvæmdastjóri
23. Kristinn Karl Brynjarsson, verkamaður
24. Elín Engilbertsdóttir, ráðgjafi
25. Rafn Steingrímsson, vefforitari
26. Jóhann Már Helgason, framkvæmdastjóri
27. Aron Ólafsson, nemi
28. Kolbrún Ólafsdóttir, sérhæfður leikskólastarfskraftur
29. Kristín B. Scheving Pálsdóttir, húsmóðir
30. Jórunn Frímannsdóttir Jensen, hjúkrunarfræðingur / deildarstjóri