Datt í stiga og fær 22 milljónir

Hæstiréttur hefur dæmt Skinney-Þinganes hf. til að greiða fyrrum starfsmanni sínum ríflega 22 milljónir í skaðabætur úr ábyrgðartryggingu sinni vegna vinnuslyss sem maðurinn varð fyrir við störf í mjölhúsi félagsins.

Manninum var falið að þrífa loft mjölhúss og höfðu hann og samstarfsmenn hans komið fyrir vinnupalli ofan á lyftaragaffli. Til að komast upp á vinnupallinn stilltu þeir upp stiga sem maðurinn hugðist klifra upp.

Það vildi svo óheppilega til að þegar hann var efst í stiganum, í um þriggja og hálfs metra hæð, rann hann til á gólfinu með þeim afleiðingum að maðurinn datt og brotnaði á úlnlið vinstri handar og einnig á hægri hendi.

Samkvæmt matsgerð bæklunarskurðlækna er maðurinn með 100% varanlega örorku.

Töldu sig ekki bera ábyrgð á slysinu

Skinney-Þinganes og Vátryggingafélag Íslands töldu sig ekki bótaskyld enda var það að þeirra mati ósannað að þeir hefðu borið ábyrgð á slysinu. Ekkert benti að þeirra mati til þess, að lyftarinn, vinnupallurinn eða stiginn, hafi verið vanbúinn og ekki uppfyllt öryggiskröfur laga og reglugerða um þess konar tæki og notkun þeirra.

Maðurinn hélt því fram fyrir dómi að vinnuveitandinn hefði lagt hart að honum og samstarfsmönnum hans að klára verkið sem fyrst, enda væri von á eftirlitsmönnum. Hæstiréttur tók þennan framburð trúanlegan.

Maðurinn taldi hinsvegar að vinnuveitanda sínum hefði láðst að tryggja honum öruggar vinnuaðstæður með fullnægjandi hætti. Í forsendum niðurstöðu héraðsdómsins segir að „verkstjórn hafi verið ábótavant í umrætt sinn að því leyti að stefnandi fékk ekki fyrirmæli um það hvernig vinna bæri verkið en víst er að slysið hefði ekki orðið ef stefnanda hefði verið lyft upp með lyftaranum.“

Taldist vinnuveitandinn hafa sýnt af sér stórfellt gáleysi enda hefði með einföldum hætti verið hægt að koma í veg fyrir tjónið af hans hálfu.