210 krónur geta skilið á milli lífs og dauða

UNICEF á Íslandi og Kiwanisumdæmið Ísland Færeyjar taka í dag höndum saman og hvetja landsmenn til að leggja baráttunni gegn stífkrampa lið. Á níundu hverri mínútu deyr nýbökuð móðir eða nýburi úr þessum kvalafulla sjúkdómi. Engu að síður má með bólusetningu koma í veg fyrir hvert einasta dauðsfall af hans völdum.

Samstarfið á Íslandi og í Færeyjum er liður í alþjóðlegri baráttu UNICEF og Kiwanis gegn stífkrampa. Meðal þess sem samtökin vilja vekja athygli á er að það kostar aðeins 210 krónur að bólusetja barnshafandi konu og ófætt barn hennar gegn þessari ömurlegu veiki.

„Það er furðuleg tilhugsun að svo lág upphæð geti skilið á milli lífs og dauða,“ segir Stefán Ingi Stefánsson, framkvæmdastjóri UNICEF á Íslandi.

Með því að senda sms-skilaboðin STOPP í símanúmerið 1900 gefur fólk 630 krónur eða sem nægir fyrir bólusetningu fyrir þrjár mæður og ófædd börn þeirra.

Hálfrar aldar saga Kiwanis á Íslandi

Um þessar mundir fagnar Kiwanis því að 50 ár eru liðin frá því að saga hreyfingarinnar hófst hérlendis með stofnun Kiwanisklúbbsins Heklu. Af því tilefni verður í dag opnuð sögusýning í Kringlunni þar sem gestir og gangandi geta fræðst um sögu hreyfingarinnar. Félagar í Kiwanis munu auk þess dreifa upplýsingum um samstarfið við UNICEF og mikilvægi þess að stöðva stífkrampa fyrir fullt og allt.

Þótt bakterían sem veldur stífkrampa fyrirfinnist í öllum löndum jarðar hefur sjúkdómnum víðast hvar verið útrýmt með bólusetningu. Á árum áður var stífkrampi til að mynda landlægur meðal ungbarna á Íslandi og dánartíðni geysilega há. Í dag er hann er hins vegar nánast óþekktur á Vesturlöndum.

Raunhæft að stöðva stífkrampa

Tekist hefur að útrýma stífkrampa í 34 löndum frá síðustu aldamótum og lækka dánartíðni nýbura af völdum sjúkdómsins um hvorki meira né minna en 90% á tuttugu árum. Hann er þó enn að finna í 25 ríkjum. Samstarf Kiwanis og UNICEF er veigamikill þáttur í því markmiði að sigrast endanlega á stífkrampa.

„Alþjóðlega Kiwanishreyfingin og UNICEF eiga að baki árangursríkt samstarf í baráttunni fyrir bættum lífsskilyrðum barna á heimsvísu. Nú leggjum við hér á Íslandi og í Færeyjum okkar lóð á vogaskálarnar í baráttu beggja samtaka gegn stífkrampa,“ segir Dröfn Sveinsdóttir, umdæmisstjóri Kiwanis á Íslandi og í Færeyjum.

„Meirihluti mæðra og nýbura sem látast úr stífkrampa búa á svæðum þar sem konur eru fátækar og hafa takmarkaðan aðgang að heilsugæslu og upplýsingum um öruggar barnsfæðingar. Þetta eru mæður og börn sem við megum ekki bregðast.“