„Við munum ekki sætta okkur við verkfall, nú setjum við hnefann í borðið“

Þann 9. apríl 2014 munu örlög 14.000 háskólanema ráðast. Þann dag tekur Félag Háskólakennara ákvörðun um hvort boðað verði til verkfalls í Háskóla Íslands, á lögbundnum prófatíma dagana 25. apríl til 10. maí.

Stjórnvöld hafa því aðeins innan við viku til þess að semja við Félag Háskólakennara svo afstýra megi verkfalli en í fréttatilkynningu frá Stúdentaráði kemur fram að verkfallið gæti eyðilagt prófatímabil stúdenta, útborgun námslána, sumarvinnu og kostnaðarsamar ferðaáætlanir.

„Stúdentaráð hefur látið útbúa vefsíðuna 9. april þar sem hægt er að senda öllum þingmönnum og ráðamönnum þessarar þjóðar einföld skilaboð. Síðan var send út í loftið klukkan 08:00 í morgun og strax hafa yfir 500 manns skrifað undir,“ segir í yfirlýsingunni.

Tilgangur síðunnar er að fá sem flesta til að senda þingmönnum póst, til þess að vekja athygli á stöðunni og þrýsta af fullum krafti á að hlustað verði á nema við Háskólana.

„Við munum ekki sætta okkur við verkfall, nú setjum við hnefann í borðið og krefjumst þess að óvissunni verði eytt, fyrir 9.apríl og fókusinn settur á þá 14.000 einstaklinga sem eiga framtíðarplön sín undir.“