Staða safnstjóra á nýju safni auglýst

Staða safnstjóra hjá nýju safni í eigu Reykjavíkur hefur verið auglýst til umsóknar af menningar- og ferðamálasviði borgarinnar. Starfið mun fela í sér samruna og samþættingu starfsemi Minjasafns Reykjavíkur, Víkurinnar – Sjóminjasafnsins í Reykjavík, Ljósmyndasafns Reykjavíkur og Viðeyjar.

Safnið mun verða eitt stærsta safn Íslands og hafa umsjón með menningarminjum í Reykjavík og ber ábyrgð á söfnum, skráningu, rannsóknum og miðlun á fjölbreyttum safnkosti, samkvæmt tilkynningu frá menningar- og ferðamálasviði Reykjavíkur.

,,Þetta er einstaklega spennandi verkefni fyrir þann sem velst til að leiða nýtt safn“, segir Svanhildur Konráðsdóttir, sviðsstjóri Menningar- og ferðamálasviðs, í tilkynningunni, en vinna við undirbúning samruna áðurnefndra menningarstofnana er komin á fulla ferð.

,,Markmiðið með sameiningunni er að búa til sterkari einingu, bæði faglega og rekstrarlega, og sækja fram eftir margra ára samdrátt í rekstrarumhverfi safnanna í borginni. Við sjáum mikil tækifæri í að móta nútímalega og metnaðarfulla menningarstofnun sem hefur fjölmarga snertifleti við borgarbúa og gesti.“

Jafnframt mun safnið bera ábyrgð á skráningu fornleifa, húsa og mannvirkja, rannsóknum og eftirliti þeirra og vera ráðgjafi borgaryfirvalda um verndun menningarminja í Reykjavík og um önnur menningarsöguleg verkefni.

Umsóknarfrestur rennur út þann 19. janúar nk. og gert er ráð fyrir að viðkomandi hefji störf eigi síðar en 15. mars nk.