Það er vinna á bak við þessa vöðva

Eva Sveinsdóttir, 39 ára, fyrsta atvinnufitnesskona á Íslandi, náði að komast í topp tíu í World Championship WBFF sem er heimsmeistarakeppni í fitness. Keppnin fór fram í lok ágúst í Las Vegas en hún keppti þar í flokki sem ber yfirskriftina Pro figure.   Eva fletti með okkur í gegnum myndaalbúmið sitt.

„Ég steig á svið með frægustu finess konu heims, Monicu Brant. Það var ekki leiðinlegt en við erum i góðu sambandi og höfum verið það frá því ég kynntist henni fyrir þremur árum," segir Eva.

Hvað gerir þú fyrir utan fitness? „Ég vann hjá slökkviliðinu á höfuðborgarsvæðinu í sumar en ég var í sjúkraflutningum. Ég hef starfað við það áður, samhliða löggæslustörfum en ég er menntuð í þessu bæði sem lögreglumaður og sjúkraflutningamaður eða EMT- Basic eins og það kallast," útskýrir Eva en í dag leggur hún stund á hjúkrunarfræði.

Þegar við spyrjum Evu hvernig hún nái þessum árangri þegar kemur að fitness svarar hún: „Með því að hafa heilbrigðan lífsstíl að markmiði."

„Ég var fyrst ó mæ glætan en þetta virkaði vel í Vegas," svarar Eva þegar við spyrjum hana út í borðann sem hún bar eins og sjá má á myndinni hér að ofan.