Verkið kallar á mann að láta flytja sig

„Hópurinn heitir KÚBUS, eins og teningur, og við erum fyrstu fjögur hornin. En ætlunin er að hafa hópinn breytilegan að stærð og lögun og vinna með listamönnum úr öðrum listgreinum,“ segir Guðrún Dalía Salómonsdóttir, píanóleikari og einn meðlima kvartettsins KÚBUS.

Auk Guðrúnar samanstendur kvartettinn af Ingridi Karlsdóttur fiðluleikara, Grími Helgasyni klarínettuleikara og Júlíu Mogensen sellóleikara, en þau munu flytja verkið Kvartett um endalok tímans eftir franska tónskáldið OlivierMessiaen í Tjarnarbíói næstkomandi laugardag. Þau Guðrún Dalía, Júlía og Grímur tóku sér frí frá æfingum og ræddu við blaðamann um verkið, sem þau segja að hafi kallað á flutning þeirra.

„Markmið hópsins er að fá nýja áhorfendur og einnig að gera tilraunir með uppsetningar og samsetningar á tónlist og öðrum listgreinum og taka áhættu,“ segir Júlía.

Þetta eru fyrstu tónleikar hópsins, sem var formlega stofnaður í vor.

„Við völdum Tjarnarbíó fyrir flutninginn, sem er frekar óhefðbundinn staður fyrir klassíska tónleika. Við vildum vera í leikhúsi og setja þetta í pínulítinn leikhúsbúning og þannig brjóta upp þetta hefðbunda tónleikaform.“

Spurður hvers vegna þetta verk hafi orðið fyrir valinu segir Grímur hópinn lengi hafa haft áhuga á að takast á við tónsmíðina.

„Þetta er reyndar mjög mikið spilað verk enda 20. aldar klassík. En þetta er það gott og fjölbreytilegt verk að það eru örlög þess að vera oft flutt. Það hreinlega kallar á mann að láta flytja sig.“

Þau segja verkið ekki einungis ná til þeirra sem hlusta á og þekkja klassíska tónlist.

„Verkið nær til breiðs hóps og ég held að það nái fólki hvort sem það hlustar á klassíska tónlist eða ekki. Það er svo áhrifamikið að þú þarft ekki að vita neitt um tónlist eða einu sinni hafa það mikinn áhuga á henni til þess að verða gagntekin,“ segir Guðrún Dalía.

Saga tónskáldsins og verksins er dramatísk, en Messiaen samdi verkið í haldi nasista í fangabúðum í Görlitz. Innan þeirra veggja var kvartettinn frumfluttur í janúar 1941, þar sem bæði flytjendur og áheyrendur voru í haldi.

Tónleikarnir eru styrktir af Tónleikasjóði og verða sem áður segir í Tjarnabíói laugardaginn 7. september og hefjast klukkan 22.