Neyðarmóttaka vegna nauðgana ekki í símaskránni

„Neyðarmóttaka vegna nauðgana er ekki í símaskránni undir ja.is. Konum þarf sjálfum að detta í hug að hringja á Landspítalann til þess að leita hana uppi. Ef konur hafa kjark til þess að fara á Bráðamóttöku Landspítalans í Fossvogi er hvergi sjáanlega merkt að sá staður sé fyrir konur sem leita hjálpar vegna nauðgunar. Konur þurfa að ganga að glerbúrinu fyrir framan alla þá sem bíða eftir lækni og tilkynna að þær þurfi hjálp vegna nauðgunar. Þetta aðgengi er óviðunandi."

Svona skrifar Guðrún Jónsdóttir, talskona Stígamóta, í grein sem birtist í Fréttablaðinu og á Vísi í dag. Í greininni, sem ber heitið „Áskorun til velferðarráðherra", bendir Guðrún á að aðbúnaður Neyðarmóttöku nauðgana hafi versnað verulega undanfarin ár, svo mikið að konur geta ekki einu sinni fundið símanúmerið á deildinni með einföldum hætti.

Guðrún tekur þó sérstaklega fram að það sé ekki við starfsfólkið að sakast. „Eyrún Jónsdóttir, hjúkrunarfræðingur og verkefnisstýra á Neyðarmóttöku, hefur verið vakin og sofin yfir þjónustunni, en það er bara ekki nóg," skrifar Guðrún.

Í greininni bendir Guðrún einnig á að fórnarlömbum nauðgana, sem leituðu á neyðarmóttökuna, hafi verið mætt af sérþjálfuðu teymi sem samanstóð af hjúkrunarfræðingi, lækni, félagsráðgjafa, lögreglu og lögmanni. Nú er öldin önnur. Nú er ekki einu sinni yfirlæknir á deildinni. Guðrún skrifar:

„Það er enginn yfirlæknir lengur, félagsráðgjöfunum var kippt út úr teyminu, en konum býðst að hitta sálfræðing síðar. Sérþjálfuðu og reyndu hjúkrunarfræðingarnir sem voru í nauðgunarteyminu eru nú bráðadeildarhjúkrunarfræðingarnir sem hlaupa í nauðgunarmálin á milli annarra bráðaverka."

Hægt er að lesa grein Guðrúnar hér fyrir neðan.

Athugasemd frá ja.is: Þegar Landspítalanum er slegið inn á ja.is þá má finna símanúmer neyðarmóttökunnar vegna nauðgunar í undirflokki. Þar er hægt að sjá hér. Aftur á móti kemur ekki neitt upp ef sérstaklega er leitað eftir nafni neyðarmóttökunnar. Slá þarf inn leitarorðið Landspítali til þess að finna númerið í undirflokknum.