Eiður og Kolbeinn snúa aftur í landsliðið

Lars Lagerbäck, A-landsliðsþjálfari í knattspyrnu, valdi Eið Smára Guðjohnsen í landsliðshóp sinn fyrir vináttulandsleikinn gegn Rússum í byrjun febrúar. Sá leikur fer fram á Spáni. Kolbeinn Sigþórsson er líka aftur kominn inn í hópinn eftir meiðsli.

Bæði Lagerbäck og Eyjólfur Sverrisson, þjálfari U-21 árs liðsins, tilkynntu landsliðshópa sína fyrir leiki 6. febrúar. U-21 árs liðið er að undirbúa sig fyrir undankeppni EM en dregið verður í riðla í lok mánaðarins. Eyjólfur stokkar sitt lið algjörlega upp og meirihluti hópsins eru nýliðar.

Blaðamannafundinum var lýst beint á Vísi. Lesa má allt það helsta sem fram fór á fundinum hér að neðan og sjá leikmannahópana.

13.49: "Við þurfum að vinna fleiri leiki. Það snýst allt um það í fótbolta," segir Lars. Þetta eru ekki flókin fræði. Blaðamannafundi lýkur á þessum orðum.

13.48: "Ég hef ekki áhyggjur af Gylfa sem stendur. Hann tapar ekki gæðum þó svo hann spili lítið. Sumir leikmenn þurfa að spila meira til að halda sér í standi. Ég veit að Gylfi heldur sér við með gæðaæfingum og hann fær sínar mínútur hjá Spurs. Þetta er samt ekki fullkomin staða fyrir hann. Ef hann spilar ekkert með þeim lengi þá þarf ég að skoða þá stöðu. Leiktími skiptir miklu máli."

13.47: "Kolbeinn er að æfa á fullu og vonandi getum við notað hann í þessum landsleik. Ajax mun prófa hann eitthvað en leikmaðurinn er við hestaheilsu. Hann er 100 prósent klár í slaginn."

13.46: "Sölvi Ottesen er meiddur og hefur ekki spilað í marga mánuði með FCK. Staða hans þar er dökk. Það er erfitt að velja hann ef hann er ekki að spila. Ég vona að hann fari að spila aftur."

13.45: "Aron Jóhannsson var jákvæður gagnvart íslenska landsliðinu. Hann er meiddur núna og því ekki hægt að velja hann. Ég held að Aron muni velja íslenska landsliðið fram yfir Bandaríkin," segir Lars en Heimir aðstoðarþjálfari hefur fundað með honum. "Það var góður fundur. Við setjum enga pressu á hann. Aron tekur sínar ákvarðanir sjálfur og vonandi velur hann Ísland."

13.44: Lars segist vera ánægður með frammistöðu Hannesar í markinu. "Hann gerði aðeins ein mistök. Gulli er enn markvörður númer tvö hjá okkur."

13.42: "Ólafur Ingi er áhugaverður leikmaður og á skilið að fá tækifæri aftur. Arnór hefur verið mikið meiddur. Ég hitti Eið í Belgíu um síðustu helgi og ræddi við hann um landsliðið. Hann var jákvæður og vill koma til baka. Svo sjáum við til hvað gerist. Hann er frábær leikmaður. Ég sá hann því miður ekki spila því leiknum var frestað. Það var ánægjulegt hvað Eiður Smári var jákvæður í okkar spjalli," sagði Svíinn sem er að velja Eið Smára í annað sinn á sínum þjálfaraferli.

13.41: "Frábært að spila gegn Rússum sem eru í níunda sæti á FIFA-listanum. Við viljum spila gegn bestu liðunum. Það væri svo virkilega gaman að spila umspilsleik á Íslandi í nóvember."

13.39: "Frábært að fá Kolbein aftur inn í hópinn. Við viljum að sjálfsögðu hafa slíkan mann í hópnum," segir Svíinn. "Við eigum góðan möguleika á því að ná öðru sæti í riðlinum. Ég er bjartsýnn á okkar möguleika. Ég bíð spenntur eftir árinu. Ef við sleppum vel við meiðsli og leikbönn þá met ég möguleika okkar góða."

13.37: 10 leikmenn hafa komið í hópinn úr Pepsi-deildinni. "Það er gott að fá leikmenn úr deildinni sem fá reynslu með því að æfa með liðinu." Lars er ánægður með fjölda marka en ósáttari við varnarleikinn en bendir á að sum markanna hafi verið óheppni. Það fylgir í þessum leik.

13.35: Þjálfarinn sænski hefur rúllað yfir flesta þessa hluti áður og svo sem ekkert nýtt undir sólinni í þessum skoðunum þjálfarans. Lars notaði 42 leikmenn á síðasta ári. Alls mættu 51 þó á æfingu. Hann er ánægður að hafa getað skoðað alla þessa stráka.

13.33: Lars segist vera ánægður með viðhorf leikmanna liðsins. Það sé plús sem og föst leikatriði. Mínusar: Of mörg töp, bendir sérstaklega á Kýpur. Gulu spjöldin. Fengum of mörg mörk á okkur. Hann er þó þokkalega sáttur við frammistöðu liðsins. Það er slide show í gangi.

13.31: Lars talar um heppni og óheppni í leikjunum á síðasta ári. Upp og niður segir hann. Hefðum getað fengið fleiri stig. Samt frábært að fá svona marga æfingaleiki á mínu fyrsta ári. Aðeins 16 alvöru æfingar á árinu. "Það er sérstakt að undirbúa landslið en við spiluðum við góð lið og bættum okkur. Hefðum getað fengið fleiri stig en erum enn með í baráttunni."

13.30: Áramótaannáll Lagerbäck á enda. Áfram með fundinn.

13.25: A-landsleikurinn verður á Marbella á Spáni en þetta er í sjötta skiptið sem þjóðirnar mætast. Ísland hefur unnið einu sinni, einu sinni hafa leikar endað jafnir og þrisvar sinnum hafa Rússar farið með sigur af hólmi.

13.24: Fundur Lars byrjar á myndbandi eins og svo oft áður. Áramótaannáll hjá Svíanum. Sýnt úr öllum leikjum Íslands á árinu. Tilgangurinn með þessu myndbandi liggur ekki alveg fyrir. Við fáum okkur smá kaffi á meðan.

13.23: Það eru þrettán nýliðar í 21 árs hópnum hjá Eyjólfi Sverrissyni. Markverðirnir Árni Freyr Ásgeirsson og Rúnar Alex Rúnarsson, varnarmennirnir Hjörtur Hermannsson, Sigurður Egill Lárusson, Sindri Snær Magnússon og Orri Sigurður Ómarsson, miðjumennirnir Andri Adolphsson, Andri Rafn Yeoman, Emil Pálsson, Gunnar Þorsteinsson og Oliver Sigurjónsson og sóknarmennirnir Árni Vilhjálmsson og Kristján Gauti Emilsson.

13.21: Engar spurningar úr sal fyrir Eyjólf. Yfir á Lars.

13.20: Eyjólfur Sverrisson, þjálfari U-21 árs landsliðsins, tekur fyrstur til máls og kynnir sinn hóp. Eyjólfur bendir á að það sé mikið af nýjum mönnum í sínu liði. "Eftir næstu keppni verða þei reyndari. Þeir eiga marga yngri landsleiki og hafa því ágæta alþjóðareynslu með landsliðinu."

13.17: Eiður Smári hefur bara einu sinni verið í hópnum hjá Lagerbäck áður. Hann kom inn á sem varamaður í sigri á Færeyingum á Laugardalsvelli í ágúst síðastliðnum. Eiður Smári er markahæsti leikmaður íslenska landsliðsins frá upphafi með 24 mörk í 68 leikjum.

13.15: A-landsliðið loksins tilbúið.

A-landslið karla sem mættur Rússum ytra þann 6. febrúar:

Markmenn

Gunnleifur Gunnleifsson, Breiðablik

Hannes Þór Halldórsson, KR

Varnarmenn

Birkir Már Sævarsson, SK Brann

Ragnar Sigurðsson, FC København

Hjalmar Jónsson, IFK Gautaborg

Arnór Sveinn Aðalsteinsson, Hønefoss BK

Ari Freyr Skúlason, Sundsvall

Hallgrímur Jónasson, Sønderjyske

Miðjumenn

Emil Hallfreðsson, Hellas Verona

Aron Einar Gunnarsson, Cardiff City FC

Helgi Valur Daníelsson, AIK

Jóhann Berg Guðmundsson, AZ

Birkir Bjarnason, Pescara Calcio

Ólafur Ingi Skúlason, SV Zulte Waregem

Gylfi Þór Sigurðsson, Tottenham Hotspur FC

Sóknarmenn

Eiður Smári Guðjohnsen, Club Brugge

Kolbeinn Sigþórsson, Ajax FC

Alfreð Finnbogason, sc Heerenveen

Arnór Smárason, Esbjerg

13.12: Loksins búið að slá U-21 árs liðið. A-landsliðið á leiðinni.

U-21 árs landsliði sem mætir Wales ytra þann 6. febrúar:

Markmenn

Árni Freyr Ásgeirsson, Keflavík

Rúnar Alex Rúnarsson, KR

Varnarmenn

Brynjar Gauti Guðjónsson, ÍBV

Sverrir Ingi Ingason, Breiðablik

Hjörtur Hermannsson, PSV

Sigurður Egill Lárusson, Valur

Sindri Snær Magnússon, Breiðablik

Orri Sigurður Ómarsson, AGF

Miðjumenn

Guðmundur Þórarinsson, Sarpsborg

Arnór Ingvi Traustason, Keflavík

Andri Adolphsson, ÍA

Andri Rafn Yeoman, Breiðablik

Emil Pálsson, FH

Gunnar Þorsteinsson, Ipswich

Oliver Sigurjónsson, AGF

Sóknarmenn

Emil Atlason, KR

Hólmbert Friðjónsson, Fram

Árni Vilhjálmsson, Breiðablik

Kristján Gauti Emilsson, FH

13.07: Hallgrímur Jónasson er einnig kominn aftur eftir meiðsli. Það er enginn leikmaður í hópnum sem er í banni gegn Slóveníu. Kári Árnason, Grétar Rafn Steinsson og Rúrik Gíslason eru allir í banni þá og því ekki valdir núna.

13.05: Hóparnir eru komnir í hendur blaðamanna og verða birtir hér að neðan innan skamms. Stóru tíðindin eru þau að Eiður Smári Guðjohnsen er valinn í hópinn á nýjan leik. Kolbeinn Sigþórsson snýr einnig aftur eftir meiðsli.