Öryrkjabandalagið harðlega gagnrýnt í nýrri úttekt

Öryrkjabandalag Íslands (ÖBÍ) sætir harðri gagnrýni í úttekt sem nefnd um endurskoðun á skipulagi og uppbyggingu ÖBÍ gerði og Fréttablaðið hefur undir höndum.

Bandalagið er þar meðal annars gagnrýnt af helstu samstarfsaðilum þess fyrir stefnuleysi, skort á framtíðarsýn og að vinna án tillits til heildarhagsmuna öryrkja. Á meðal samstarfsaðilanna eru þekktir stjórnendur ríkisstofnana, forsvarsmenn félagasamtaka og fyrrverandi ráðherra. Í samantekt viðtala við þá aðila segir að gagnrýni og kröfur ÖBÍ gangi svo langt að samstarfsaðilarnir telji skilaboð þess „varla svaraverð“.

„Samstarfsaðilarnir sem þarna um ræðir er fólk sem við höfum verið að kljást við og við vorum mjög stíf á að það mætti ekki endalaust skerða réttindi öryrkja eða lífeyrisþega,“ segir Guðmundur Magnússon, formaður ÖBÍ.

Úttektin inniheldur einnig niðurstöður úr könnun MMR sem ÖBÍ lét gera á viðhorfi almennings til árangurs og áherslna bandalagsins. Þar kemur fram að einungis tuttugu prósent aðspurðra töldu bandalagið hafa náð góðum eða frekar góðum árangri þegar kemur að fjárhagslegum kjörum fatlaðs fólks.

„Niðurstöður úttektarinnar eru sláandi og ég er ekki hrifin af þeirri aðferðafræði sem bandalagið hefur notað í baráttu sinni,“ segir Ellen Calmon, varaformaður ÖBÍ. Hún segir augljóst að bandalagið hafi ekki náð æskilegum árangri og af þeim sökum ætli hún í framboð gegn sitjandi formanni á næsta aðalfundi ÖBÍ þann 19. október næstkomandi.

Spurð um nánari útskýringu á því hvað henni mislíkar við aðferðafræði ÖBÍ nefnir Ellen meðal annars samskipti bandalagsins við stjórnvöld.

„Ég hef fundið fyrir því að þegar stjórnvöld boða Öryrkjabandalagið á fundi hafa forsvarsmenn þess ekki séð sér fært að mæta á fundina.“

Spurður út í þetta tiltekna atriði segir Guðmundur að þarna sé um að ræða eitt tilfelli þar sem bæði hann og framkvæmdastjóri ÖBÍ hafi ekki komist á þann tiltekna fund.

„Við höfum alltaf verið tilbúintil að ræða málin en erum ekki tilbúin til að láta vaða yfir okkur hvenær sem er,“ segir Guðmundur.