Uppáhaldsflíkur herranna

Nokkrir vel valdir og áhugaverðir karlmenn voru fengnir til að tjá sig klæðaburð sinn og segja frá uppáhaldsflíkinni sinni.



Steinarr Lár, eigandi Kúkú Campers húsbílaleigunnar.

Bomsurnar



Hvernig myndir þú lýsa stílnum þínum?

„Ég á einar góðar brúnar buxur sem ég miða allt út frá. Öll föt sem ég kaupi passa við þær. Með þessu passa öllu föt sem ég á saman og ég þarf því aldrei að eyða tíma fyrir framan klæðaskápinn.“

Af hverju eru bomsurnar uppáhalds?

„Sorel-bomsurnar eru eins og að vera á 38“ breyttum jeppa, það er ekkert sem stoppar mig. Ég hlakka til vetrarins og sérstaklega asahlákudaga þegar ég ryð mér leið eins og loðfíll í gegnum miðbæinn.“

Hvar voru þær keyptar?

„Í Ellingsen."

Einar Smárason, Varaformaður Stúdentafélags HR.

Sokkarnir



Hvernig myndir þú lýsa stílnum þínum?

„Dagsdaglega er hann nokkuð casual og smart en ég hef mikið dálæti á að klæðast jakkafötum um helgar og þegar færi gefst.“

Af hverju eru þessir sokkar uppáhalds?

„Það er svolítið erfitt að velja alveg eina uppáhaldsflík en þessa dagana eru litríkir sokkar í miklu uppáhaldi hjá mér og þá sérstaklega einir fjólubláir.“

Hvar eru sokkarnir keyptir?

„Þeir heita Happy Socks og ég keypti þá í Dr. Denim á Laugaveginum.“

Róbert Róbertsson starfar á kaffihúsinu Kaffi Kompaníið á Kjarvalsstöðum.

Leðurjakkinn

Hvernig myndir þú lýsa stílnum þínum?

„Ég klæðist bara því sem mér finnst flott og því sem fer mér vel. Skyrtur, rúllukragabolir, peysur og jakkar. Ég kaupi oft frá sömu merkjunum. Ég á til dæmis allar týpurnar af Farmers Market-buxunum af því að þær passa mér vel. 



Af hverju er þessi jakki í uppáhaldi?

„Hann er í uppáhaldi vegna þess að ég er búinn að eiga hann svo lengi. Ég keypti hann þegar ég var sextán og hann er búinn að ganga með mér í gegnum súrt og sætt. Hann hefur farið með mér fimm sinnum á Hróarskeldu, þrisvar á Old Trafford og hundrað sinnum á Bakkus svona til að nefna eitthvað. Hann var eiginlega fyrsti töffarajakkinn minn og mætti kannski segja að hann hafi markað ákveðið upphaf hjá mér hvað fatavalið snertir.

Hvar var hann keyptur? 

„Ég keypti hann í Spútnik á 17.900 árið 2006. Mér fannst það rosalega mikið þá en hann er alveg búin að borga fyrir sig og rúmlega það.“