Ábyrg umfjöllun um menn og málefni

„Eins og endranær mega áhorfendur búast við ábyrgri en umfram allt þjóðmenningarlegri umfjöllun um menn og málefni,“ segir Karl Ágúst Úlfsson, spurður um komandi vetur hjá hinni einu sönnu Spaugstofu.

„Við reiknum með að fá allar okkar húsnæðisskuldir felldar niður og munum greina nákvæmlega frá því jafnóðum og þær gufa upp. En þetta gerum við nú bara vegna þess að við kusum allir stjórnarflokkana. Að öðru leyti munum við áfram styðja kvótakerfið, orkusölu með botnlausu tapi og niðurfellingu svokallaðrar menningar.“



Sem fyrr manna Spaugstofuna, auk Karls, þeir Sigurður Sigurjónsson, Pálmi Gestsson og Örn Árnason. Þar sem hlutverk þeirra hefur verið að gera grín að mönnum og málefnum hljóta efnistökin að ráðast af því hver situr við stjórnvölinn í landinu hverju sinni. Hvað gerðu þeir félagar við síðustu stjórnarskipti? Settust þeir niður og skiptu með sér hlutverkum hinna nýju ráðherra? „Nei, við fórum í bændaglímu. Sá sem felldi alla hina, helst á sniðglímu á lofti, fékk að velja sér tvö hlutverk, sem hann vill alls ekki leika. Við nefnum engin nöfn, en þeir tveir sem skíttöpuðu glímunni í ár verða látnir leika Bjarna Ben og Sigmund Davíð í vetur. Enn hefur þó enginn tapað nógu stórt til að fá Vigdísi Hauksdóttur í sinn hlut,“ segir Karl Ágúst.



En hverjum er skemmtilegast að herma eftir? „Hver öðrum. Sérstaklega höfum við gaman af að herma eftir Pálma þegar hann er að herma eftir Ólafi Ragnari.“



Spaugstofan hefst á Stöð 2 28. september.