Hefur komið í allar sveitir

Sjónvarpsþátturinn Um land allt í umsjón fréttamannsins Kristjáns Más Unnarssonar sló í gegn síðasta vetur. Þar heimsótti hann áhugavert fólk og byggðir á landsbyggðinni og kynnti fyrir landsmönnum. Kristján segir viðtökurnar ekki hafa komið á óvart. „Þátturinn fékk mikið áhorf og var einn vinsælasti þáttur stöðvarinnar og mældist stundum með meira áhorf en fréttir. Ég hef lengi fundið í starfi mínu að áhorfendur hafa mikinn áhuga á sjónvarpsefni af þessu tagi.“

Þótt þátturinn sé nýr hafa málefni landsbyggðarinnar lengi verið Kristjáni hugleikin. „Allt frá því ég hóf feril minn á Dagblaðinu fyrir 33 árum hefur það verið snar þáttur í starfinu að fara um landið og afla fanga sem víðast í fréttir af fólki, samfélögum og fyrirtækjum. Þegar ég svo fór yfir á Stöð 2 fyrir rúmum aldarfjórðungi hélt ég þessu áfram, að miðla frásögnum af mönnum og málefnum utan Reykjavíkur inn í fréttir og fréttainnslög. Í þessum þáttum núna gefst okkur færi á mun dýpri umfjöllun en stutt fréttainnskot bjóða upp á.“