Við viljum minnka notkun svefnlyfja

„Rannsóknir sýna að svona „fjarmeðferð“ getur skilað jafnmiklum árangri og meðferð sem fer fram hjá meðferðaraðila.

Með þessu móti er hins vegar hægt að hjálpa miklu fleirum, ná til allra landshluta og bjóða upp á þessa þjónustu á mikið lægra verði en áður hefur þekkst,“ segir Erla Björnsdóttir, sálfræðingur með sérhæfingu í HAMS-S og doktorsnemi í svefnrannsóknum við Læknadeild Háskóla Íslands, sem stofnaði nýverið fyrirtækið Betri svefn í samstarfi við læknana Steindór Odd Ellertsson og Gunnar Jóhannsson.

Betri svefn tók þátt í Gullegginu 2013 sem er frumkvöðlakeppni íslenskra háskólanemenda og nýútskrifaðra, fyrr á árinu og var meðal tíu efstu og fékk sérstök útflutningsverðlaun Íslandsstofu.

Aðspurð segir Erla að hugmyndin að stofnun Betri svefns hafi sprottið út frá þeim vandamálum sem blasi við okkur í nútímasamfélagi. „Á hverjum tíma glíma 10-15% fullorðinna við langvarandi svefnleysi. Samhliða því eykst notkun svefnlyfja og á Íslandi hefur orðið gríðarleg aukning síðastliðna áratugi. Sálfræðimeðferð er mjög dýr og það eru fáir sálfræðingar sem bjóða upp á sérhæfða þjónustu fyrir fólk með svefnvandamál,“ segir Erla.

Betri svefn, býður fólki með svefnvandamál upp á sambærilega meðferð og það fengi á stofu hjá sálfræðingi. „Með þessum hætti gefum við fólki tækifæri til að hafa samskipti við sinn sálfræðing heima í stofu. Á síðunni eru fyrirlestrar, persónuleg ráðgjöf og spjallborð þar sem einstaklingar geta rætt saman um vandamál sín,“ segir Erla um síðuna sem hefur verið starfrækt síðan í júlí.

Rannsóknir í Bretlandi hafa sýnt að hugræn atferlismeðferð hjá fagaðilum á internetinu, skilar jafn góðum árangri og meðferð á stofu hjá sálfræðingi. „Verkefnið hefur svo sannarlega undið upp á sig og nú þegar er byrjað að vinna að því að koma meðferðinni á laggirnar í Danmörku, Svíþjóð og Noregi. Við sjáum fyrir okkur að þessi lausn geti minnkað notkun svefnlyfja til muna í framtíðinni,“ segir Erla að lokum.