„Suður-Íslendingar“ vilja vingast við Akureyringa

Afkomendur Íslendinga sem fluttu til Brasilíu á seinni helmingi nítjándu aldar hafa mikinn hug á því að hlúa að rótum sínum á Íslandi og vinna nú að því að koma á vinabæjarsambandi milli Akureyrar og Curitiba.

Mario Reikdal Dos Santos er formaður AISBRA, Íslendingafélagsins í Brasilíu, en móðurafi hans var alíslenskur.

„Afi minn hét Karl Magnús Albertsson og fæddist í Brasilíu, en foreldrar hans voru íslenskir innflytjendur. Hann tók síðar upp nafnið Reikdal þar sem þau komu frá Reykjadal,“ segir Mario í samtali við Fréttablaðið.

Hann bætir því við að hann hafi alltaf verið meðvitaður um rætur sínar.

„Ég held mikið upp á minningu frá því að ég var fimm eða sex ára. Þar sitjum við systkinin með móður okkar uppi í rúmi þar sem hún sýnir okkur National Geographic-tímarit og segir okkur frá landi íss og elda. Hún sagði að þar lægju rætur okkar og rifjaði upp sögurnar sem amma hennar og faðir sögðu henni.“

Mario hefur komið þrisvar til Íslands, fyrst árið 1997. Hann segist hafa verið fyrstur afkomenda Brasilíufaranna til að koma til Íslands og að ferðin hafi verið tilfinningaþrungin.

„Ég er ekki mjög viðkvæmur tilfinningalega en þegar ég opnaði bók um sögu Íslands, eftir Jón Hjálmarsson, í bókabúð og fletti upp á kaflanum um flutninga Íslendinga til Brasilíu fór ég að gráta. Það snerti mig afar djúpt.“

Nú stendur yfir vinna við að koma á vinabæjarsambandi milli Akureyrar og Curitiba. Það er vel við hæfi þar sem Íslendingarnir sem fluttu til Brasilíu voru flestir Norðlendingar og sigldu frá Akureyri, og settust svo að í Curitiba í suðurhluta Brasilíu.

Curitiba hefur samþykkt málið fyrir sitt leyti. Eiríkur Björgvinsson, bæjarstjóri Akureyrar, segir að þarna séu sameiginlegir hagsmunir sem gaman væri að byggja frekari tengsl á, en ganga þurfi betur frá ýmsum formlegheitum í kringum þessar hugmyndir.

„Þetta er skemmtileg þróun og vonandi verða meiri samskipti þarna á milli því að þessi 150 ára saga er mjög merkileg.“