Gylfi þarf heldur betur að berjast fyrir sæti sínu

Ef að það hefur einhvern tímann góður tími til að hvíla Gylfa Þór Sigurðsson þá var það kannski um síðustu helgi enda framundan mikilvægir landsleikir í undankeppni HM 2014. En hver er staðan hjá okkar manni hjá Tottenham?

Seta Gylfa á bekknum allan leikinn á móti Arsenal á sunnudaginn í viðbót við alla þá nýju leikmenn sem knattspyrnustjórinn André Villas-Boas er búinn að ná í á síðustu vikum skapar vissulega óvissu um framtíðahlutverk Gylfa í liðinu.

Gylfi var inn á vellinum nær allt undirbúningstímabilið hjá Tottenham og kom inn í tímabilið fullur bjartsýni um stærra hlutverk í ár. Risasalan á Gareth Bale opnaði hinsvegar möguleika fyrir forráðamenn Tottenham til að bæta við leikmönnum og miðjumennirnir hreinlega streymdu til White Hart Lane síðustu vikur félagsskiptagluggans sem lokaði í gær.

Hinn fjölhæfi Paulinho er strax kominn í uppáhald hjá Villas-Boas, Moussa Dembélé er fastamaður á miðjunni, Nacer Chadli hefur stungið sér inn skarðið sem Gareth Bale skildi eftir sig á vinstri vængnum og þá eigum við enn eftir að sjá hvernig Villas-Boas ætlar að nota Danann Christian Eriksen.

Það hafa alls sjö miðju- eða kantmenn komið til Tottenham eftir að félagið keypti Gylfa í júlí í fyrra og þótt að þessir leikmenn séu í mismikilli samkeppni við íslenska landsliðsmanninn, sjá samanburð, þá er ljóst að samkeppni um stöður á miðsvæðinu er svakalega.

André Villas-Boas er vanalega að stilla upp í leikkerfinu 4-2-1-3 og það má segja að Gylfi komi til greina í þrjár stöður í því þótt að við Íslendingar viljum helst sjá hann í holunni fyrir aftan framherjann.

Gylfi hefur mest verið út á vinstri kanti á þessari leiktíð en það er vonandi að Villas-Boas hafi ekki hugsað hann sem tímabundna varskeifu fyrir Bale.

Hér á síðunni má sjá yfirlit yfir þá leikmenn sem teljast vera í samkeppni um stöður við Gylfa og ennfremur hvar þeir geta spilað á vellinum. Það vekur vissulega athygli að enginn þessara leikmanna eru eldri en 26 ára og langflestir á bilinu 24 til 26 ára.

Nú er bara að fyrir Gylfa að minna á sig með því að hjálpa íslenska landsliðinu í komandi leikjunum í undankeppni. Það fer örugglega ekki framhjá Villas-Boas ef (Gylfi Þór) Sigurðsson verður á skotskónum á móti Sviss og eða Albaníu.