Melódíusafnið til sölu en bara fyrir sérfróða

„Ég læt ekki einhver skriðdýr vaða í ævistarf mitt þegar ég hef sett upp tærnar,“ segir Jón Kr. Ólafsson, stofnandi og eigandi tónlistarsafnsins Melódíur minninganna á Bíldudal. Hann er á sjötugasta og þriðja aldursári og segist vilja tryggja framtíð þess.

Hann hyggst auglýsa það til sölu en þó með einhverjum skilmálum. „Því auðvitað verð ég eitthvað í þessu meðan ég stend í lappirnar og er enn óruglaður,“ útskýrir hann. „En þarna eru mikil menningarverðmæti og þau verða að vera í höndum fólks sem hefur sérþekkingu á hlutunum. En ég er ekkert að segja að safnið verði að vera á Bíldudal um aldur og ævi.“

Safnið var opnað árið 2000 á þjóðhátíðardaginn, sem jafnframt er afmælisdagur Svavars heitins Gests sem átti marga muni sem safnið geymir. „Ég hef staðið í þessu einn í þrettán ár og þeir sem þekkja til kjaramála venjulegs verkafólks vita að það hefur ekki verið einfalt mál.“

Jón Kr. segir einnig nauðsynlegt að fagfólk komi að málum. Hann hefur reyndar fengið styrk til þess að láta sagnfræðinga skrá muni en þeirri vinnu er þó ekki lokið. Safnið er á neðri hæð heimilis Jóns og segir hann að það hafi fyrir löngu sprengt utan af sér.

„Ég fékk fyrir skemmstu plakat frá heimstenórnum okkar, Kristjáni Jóhannssyni, frá því hann var að debútera á Scala hér um árið. Þessari gersemi kem ég til dæmis hvergi fyrir. Ekki fer ég að hafa þetta inni hjá mér. Ég vil nú ekki fá alla heimsbyggðina inn á rúmstokk til mín þó eflaust væri gott að fá hluta af henni.“



Kjóll af Ellý - jakki af Ragga Bjarna

Meðal annarra safngripa má meðal annars nefna kjóla af Ellý Vilhjálms, Diddú og Helenu Eyjólfsdóttur og jakka af Ragnari Bjarnasyni og Hauki Morthens. „Svo er hérna mikið af skótaui af þessu liði, ýmis verk og fjöldi mynda,“ segir Jón.

Jón Kr. hefur sjálfur sett sitt mark á melódískar minningar landans en hann söng til dæmis lagið „Ég er frjáls“ með hljómsveitinni Facon árið 1969. Hann hefur svo og gefið út fjölda hljómdiska, sungið í kvikmyndum eins og Börnum náttúrunnar auk þess sem hann hefur komið fram með mörgum af þekktustu dægurlagasöngvurum landsins.