Geðgjörgæsla opnuð næstkomandi haust

Fyrsta geðgjörgæsla landsins verður opnuð í húsnæði Landspítalans við Hringbraut næsta haust. Á deildinni munu dvelja órólegustu og veikustu sjúklingarnir en mikil þörf hefur verið fyrir frekari aðskilnaði á geðdeildum spítalans.

Páll Matthíasson, framkvæmdastjóri geðsviðs, segir deildina afar mikilvægt skref í rétta átt í þróun geðheilbrigðismála í landinu. Öryggi og þjónusta við sjúklinga verði bætt og starfsfólk deildarinnar muni fá sérstaka þjálfun í að annast órólega sjúklinga.

„Umhverfið skiptir höfuðmáli í svona þjónustu og talað er um það sem þriðja manninn í þjónustunni,“ segir hann. „Álagið minnkar á bæði starfsfólk og sjúklinga þegar umhverfið er öruggt og aðlaðandi.“ Verkefnið verður kostnaðarsamt, en í byrjun árs veitti velferðarráðuneytið 15 milljónir króna til þess.

Páll bendir þó á að til að deildin verði nothæf þurfi að lágmarki 40 milljónir. „Það yrði samt bara svona „Suzuki Swift-útgáfan“ af deildinni. Hún sleppur,“ segir hann. „En ef hún á að mæta þeim kröfum sem við setjum þá kostar hún 100 milljónir – en þá er líka komin góð „Volvo-útgáfa“.“

Geðgjörgæslan, hin gamla 32C, mun hafa karla- og kvennasvefnálmur og sérherbergi, en það hefur ekki verið þannig áður. Deild 32C verður lokað í tvo mánuði yfir sumartímann á meðan framkvæmdir standa yfir. Páll býst ekki við því að lokun deildar í tvo mánuði muni koma að sök, þar sem þjónustan dregst líka yfirleitt saman á þessum tíma, mest á fíknideildinni.

„Við veljum júlí oftast til að loka vegna viðhalds og fleira,“ segir hann. „Þá er rólegra og sérstaklega er áhugi á fíknimeðferð minni, fram yfir verslunarmannahelgi.“