Leita að fartölvu fyrir Franciscu

„Ég fékk þessa hugmynd þegar ég stóð á kassanum hjá henni. Francisca gefur alltaf svo mikið af sér án þess að biðja um neitt til baka svo ég vissi strax að margir myndu vilja hjálpa,“ segir Alda Sigmundsdóttir. Alda setti inn færslu á Facebook í dag þar sem hún kynnti til sögunnar kassadömuna Franciscu sem starfar í Bónus út á Granda. Francisca er mörgum kunn en hún hefur starfað í Bónus um langt skeið og er þekkt fyrir jákvætt og hlýtt viðmót.

Francisca kemur frá Sambíu en hún hefur búið hér á landi frá því árinu 2000. Alda fer alltaf í gegn hjá Franciscu og segir hún þær spjalla mikið saman, enda orðnar góðar vinkonur. Nú síðast hafi Alda spurt hana að því hvernig henni gengi að halda sambandi við fjölskylduna í heimalandinu. Francisca hafi þá sagt henni að hún gæti talaði við þau í gegnum síma en ekki í gegnum Skype, þar sem enginn tölva væri á heimili fjölskyldunnar.

„Mér datt því í hug að reyna að útvega fartölvu handa henni, það hlyti einhver að geta séð af einni tölvu,“ segir Alda, og viðtökurnar fóru framar úr hennar björtustu vonum. Nú þegar hafa hátt í fimmhundruð manns deilt færslunni og fjölmargir hrósað henni fyrir jákvæðni og góða þjónustu „Þetta er alveg ótrúlegt. En hún er búin að veita mörgum svo mikla gleði og margt fólk sem fer sérstaklega í röðina til hennar. Hún er greinilega að fá til baka það sem hún gefur af sér.“