Koscielny tryggði Arsenal Meistaradeildarsætið

Arsenal lagði Newcastle að velli 1-0 í lokaumferð ensku úrvalsdeildarinnar í knattspyrnu í dag. Sigurinn tryggir liðinu 4. sæti deildarinnar og sæti í forkeppni Meistaradeildar Evrópu á næstu leiktíð.

Gestirnir frá Lundúnum réðu ferðinni á St. James' Park í dag en gekk illa að skora. Eina mark leiksins kom á sjöundu mínútu í síðari hálfleik þegar miðvörðurinn Laurent Koscielny skoraði.

Steve Harper lék sinn síðasta leik fyrir Newcastle í dag og litlu munaði að hann þyrfti að sækja knöttin í net sitt öðru sinni þegar skot Theo Walcott í viðbótartíma hafnaði í stönginni.

Arsenal hafnar því í fjórða sæti en Tottenham, sem lagði Sunderland með draumamarki Gareth Bale, hafnar í því fimmta. Með sigri hefði Newcastle hafnaði í 12. sæti deildarinnar en tap skilur liðið eftir í 16. sæti.