Rýra afkomu Ríkisútvarpsins um 260 milljónir króna

Páll Magnússon, útvarpsstjóri Ríkisútvarpssins ohf., ritar starfsfólki sínu bréf í dag og greinir frá því hvernig fjárlagafrumvarp næsta árs snertir rekstur RÚV. Páll segir að fjárlagafrumvarpið og ný lög um Ríkisútvarpið rýra afkomu RÚV á næsta ári um rúmlega 260 milljónir króna sem mæta þurfi með niðurskurði.

„Við þessu verðum við að bregðast - sem og öðrum þáttum sem horfa til hins verra í rekstri RÚV, ekki síst samdrætti í auglýsingasölu,“ skrifar Páll í bréfi sínu til starfsmanna. Páll segir ennfremur að unnið sé að hugmyndum og áætlunum í rekstri RÚV í samræmi við nýtt fjárlagafrumvarp. Búast má við niðurstöðu í þeim efnum um næstu mánaðarmót.

RÚV fær 3,5 milljarða króna í fjárlagafrumvarpi næsta árs sem er hækkun um 319 milljónir á milli ára. Ekki er farið fram á niðurskurð hjá RÚV ef marka má fjárlög en Páll segir að raunveruleg hagræðingarkrafa sé 7%.

„Þær greinar nýrra laga um RÚV sem skerða auglýsingatekjur og auka rekstrarkostnað eru látnar halda sér, en tekjuauki sem átti að koma þar á móti er ekki látinn taka gildi nema að litlu leyti. Þannig ætlar ríkið áfram að taka um 400 milljónir króna af innheimtu útvarpsgjaldi á næsta ári og nota í aðrar þarfir ríkissjóðs,“ skrifar Páll Magnússon í bréfi til starfsfólks RÚV.