Grunnskólabörn gengu yfir Vaðlaheiði

„Það var erfitt að labba svona langt, en ég labbaði bara áfram alla leið. Við sáum skóg og dót á leiðinni og svo grilluðum við pylsur. Þetta var fínt,“ segir Kristófer Örn Sigurðarson, nemandi í fyrsta bekk í Valsárskóla á Svalbarðseyri en hann gekk yfir Vaðlaheiði ásamt skólafélögum sínum á þriðjudaginn fyrir viku, á árlegum Göngudegi skólans.

Göngudagurinn er hluti af námsmarkmiðum Valsárskóla í útikennslu og var gengið frá Skógum í Fnjóskadal, eftir gamla veginum og síðan eftir gamalli þjóðleið sem liggur af heiðinni niður að Valsárskóla, alls um átján kílómetra.

Yngstu bekkirnir fengu bílfar áleiðis upp heiðina en elstu nemendurnir gengu alla leið.

„Mér fannst þetta erfitt,“ Segir Rakel Mjöll Jóhannsdóttir, nemandi í níunda bekk. „Það var kalt uppi á heiðinni og ég fékk hausverk. Við stoppuðum tvisvar til að bíða eftir þeim sem voru að tína ber. Ég vildi ekki tína ber því ég var að fara í útivistaval á eftir og þar áttum við að fara í berjamó,“ bætir hún við. 

Kristófer segir krakkana í Valsárskóla oft fara í slíkar vettvangsferðir með kennurunum. 

„Við bjuggum einu sinni til indjánatjald og vorum að tálga og saga spýtur í skóginum,“ segir hann hress og Rakel segir bekkinn hennar hafa gengið á Kaldbak og Súlur í útivistarvali. „Í fyrra bjuggum við til snjóhús með því að saga ís, fórum á gullfiskaveiðar og helgarferð í Ásbyrgi,“ bætir hún við.

Í ferðinni yfir heiðina sáu krakkarnir báða enda Vaðlaheiðaganga og skoðuðu fornleifauppgröft við eystri enda ganganna í Fnjóskadal. 

Þá fundu krakkarnir rolluhræ sem hafði orðið úti á heiðinni í stórhríðinni í fyrra og voru frædd um örnefnin í kring. Krakkarnir sáu einnig húsin sín og skólann frá alveg nýju sjónarhorni sem mörgum þótti mjög skemmtilegt.