Stikla úr nýjustu mynd Ragnars Bragasonar

Stikla úr kvikmyndinni Málmhaus, nýjustu kvikmynd Ragnars Bragasonar, er komin á veraldarvefinn. Málmhaus verður frumsýnd í næsta mánuði og fjallar myndin um unga stúlku, Heru Karlsdóttur, sem er áhyggjulaus í sveitinni þar til harmleikur dynur yfir. Eldri bróðir hennar deyr af slysförum og Hera kennir sjálfri sér um dauða hans. Í sorginni finnur hún sáluhjáp í þungarokki og dreymir um að verða rokkstjarna. Þorbjörg Helga Dýrfjörð fer með aðalhlutverkið í myndinni.

Þetta er fyrsta kvikmynd Ragnars í fjögur ár en síðast leikstýrði hann kvikmyndinni Bjarnfreðarson sem kom út árið 2009. Ragnar leikstýrði einnig Vaktarþáttaröðunum sem sýndar voru við miklar vinsældir á Stöð 2 fyrir nokkrum árum. Hann hefur einnig leikstýrt myndum á borð við Foreldrar, Börn, og Fíaskó.

Auk Þorbjargar fara þau Ingvar E. Sigurðsson, Halldóra Geirharðsdóttir, Jörundur Ragnarsson og Hannes Óli Ágústsson með helstu hlutverk í myndinni. Ágúst Jakobsson sá um kvikmyndatöku og Valdís Óskarsdóttir klippti. Pétur Ben samdi tónlistina í myndinni.