Alþjóðleg leit að foreldrum litlu ljóshærðu stúlkunnar

Yfirvöld í Grikklandi hafa biðlað til allra þjóða að hjálpa sér að bera kennsl á ungu stúlkuna sem fannst í bænum Farsala á Grikklandi á miðvikudag. Stúlkan fannst í haldi Rómafólks þegar lögreglan leitaði að fíkniefnum og vopnum í búðum fólksins.

Grísk yfirvöld hafa áhyggjur af því að stúlkan sé fórnarlamb mansals með börn.

Stúlkan sem er kölluð Maria er talin vera fjögurra ára og er núna sinnt af félagsmálayfirvöldum í Grikklandi.

Vísir sagði frá því í dag að DNA-próf hafi leitt það í ljós að stúlkan er ekki blóðskyld parinu, en þau halda því fram stúlkan hafi verið gefin þeim og þau hafi hugsað vel um hana. Þau hafa verið handtekin og verða ákærð fyrir mannrán.

Myndband sem fannst í fórum parsins staðfestir að stúlkan hefur verið með þeim í einhvern tíma, en í myndbandinu virðist hún vera um tveggja ára.