Besti flokkurinn fengi 7 borgarfulltrúa ef kosið yrði nú skammkvæmt nýrri könnun. Enn hefur þó ekki verið upplýst hvort flokkurinn og leiðtogi hans bjóði fram í kosningunum næsta vor.

Samkvæmt nýrri könnun Capacent er Besti flokkurinn stærsti stjórnmálaflokkurinn í Reykjavík, með 37 prósent og sjö fulltrúa ef gengið yrði til kosninga í dag. Sjálfstæðisflokkurinn fengi 31 prósent, Samfylkingin 15 prósent, VG 10 prósent og Framsóknarflokkurinn fjögur.

Heiða Helgadóttir framkvæmdastjóri Besta flokksins er að vonum kát með þessa niðurstöðu.

„Okkur finnst þetta auðvitað mjög gleðilegt. Við höfum haft fulla trú á því að við myndum, í sjálfbæra gegnsæinu, koma til baka. Það hefur verið að sýna sig í þessum könnunum. Við höfum svo sem alveg farið niður á við líka en alltaf haldið okkar striki og ekki verið að hlaupa eitthvað undan okkur og gera eitthvað annað en við eru sátt við.“

Þið hafið sem sagt ekki verið í neinum lýðskrumsleik?

„Nei, við teljum svo ekki vera. Við höfum bara verið að láta sjálfbæra gegnsæið vinna með okkur.“

Jón Gnarr borgarstjóri hefur verið leyndardómsfullur um fyrirætlanir sínar en þessi könnun hlýtur að gefa flokknum byr í seglin. Fréttastofa spurði hinn pólitíska ráðgjafa Besta flokksins, Björn Blöndal, sem nú er staddur í Kína, hvort þetta væri ekki til að auka líkurnar á því að Jón fari fram? Björn telur þetta auka líkur á að Jón tilkynni um fyrirætlanir sínar 30. þessa mánaðar í sérstökum útvarpsþætti á hrekkjavöku. Heiða er á svipuðu róli í sínum svörum, þegar hún er spurð hvort hún sjái fyrir sér breytingar á lista flokksins?

„Sko... Jón Gnarr hefur lýst því yfir að hann muni tilkynna um sína framtíð og framtíð flokksins, að einhverju leyti, 30. október. Við verðum bara að sjá til. Það eru níu dagar í það ennþá. Það er leyndarmál þangað til.“

En, ef Jón sjálfur fer ekki fram, þýðir það þá að Besti sé fyrir bý. Er framtíð flokksins alveg háð því hvað hann gerir?

„Það verður bara að koma í ljós þá líka,“ segir Heiða Helgadóttir.