Svona hafa sumir hlutir raðast saman

Hér eru skýin snjakahvít nefnist sýning sem Sigurbjörg Þrastardóttir skáld er með í listasetrinu Kirkjuhvoli á Akranesi. Spurð út í titilinn svarar hún: „Titillinn er lína úr ljóði sem heitir Heim um jólin og fjallar um hugarástand mitt á leið frá Hvalfjarðargöngunum meðfram Akrafjallinu út á Skagann. Það vill þannig til að ljósmynd eftir Guðmund Bjarka Halldórsson sýnir akkúrat sama svæði, á þeirri mynd eru skýin snjakahvít og fleiri element eru þau sömu og í ljóðinu.“



Eitt verkanna á sýningunni segir Sigurbjörg vera eftir gamlan prófessor í Berlín. „Ég hef aldrei hitt manninn en hann hafði lesið eftir mig ljóð, vildi þakka mér fyrir það og sendi mér teikningu, ég sá strax að hún mundi passa á bókina Stekk sem ég var að skrifa, og fékk góðfúslegt leyfi til að nota hana. Svona hafa sumir hlutir raðast saman."



Sigurbjörg segir hafa verið kúnst að koma verki Bjarna Sigurbjörnssonar, málara í Kópavogi, inn í Kirkjuhvol, því það sé fimm og hálfur metri að lengd. „Bjarni málaði verkið á ljóðahátíð sem ég tók þátt í í Norræna húsinu. Það var gjörningur. Hann bað mig að skrifa eina línu á flötinn áður en hann byrjaði, þannig að línan er týnd undir öllum málningarlögunum en lifir enn í titli verksins.“



Sigurbjörg upplýsir að Kirkjuhvoll sé að fá nýtt hlutverk um áramót eftir að hafa þjónað sem listasetur bæjarins síðustu ár og áður sem prestssetur og síðan heimavist. „Mér þótti heiður að fá að vera með síðustu sýninguna þar,“ segir hún.