Yfir hundrað tíst hjá löggunni

Netverjar fengu heldur betur innsýn inn í störf lögreglu í nótt en hún sagði frá atburðum gærkvöldsins og næturinnar á twitter-bloggi sínu.

Á tólf tímum setti hún inn um hundrað færslur sem flestar voru af útköllum vegna ölvunar. Á miðnætti réðust tveir karlmenn á mann í austurborginni. Sá sem fyrir árásinni varð leitaði sér aðstoðar í nærliggjandi húsi en upplýsingar liggja hvorki fyrir um áverka hans né árásarmennina.

Lögreglumaður á Slysadeild óskaði eftir liðsauka vegna slagsmála þar um þrjúleytið og voru nokkrir handteknir í kjölfarið. Um fjögurleytið var lögreglu svo tilkynnt um líkamsárás í miðborginni, málsatvik eru enn óljós og er málið í rannsókn.

Nokkrar færslur, eða svokölluð tíst, lögreglu hafa væntanlega vakið kátínu meðal netverja þar á meðal tilkynning frá óánægðum viðskiptavini í matvöruverslun sem var óhress með að fá ekki skjóta afgreiðslu þar sem einungis einn starfsmaður var á vakt.

Lögreglan hér á landi var ekki sú eina sem var iðin við tístið þessa nóttina því kollegar erlendis gerðu slíkt hið sama enda um að ræða alþjóðlegt maraþontíst.