Villas-Boas telur Tottenham sterkari

Þrátt fyrir að vera að missa sinn besta mann telur Andre Villas-Boas að Tottenham sé sterkara en í fyrra. Framtíð Gareth Bale hefur verið helsta umræðuefni fjölmiðla síðustu vikur en á sama tíma hefur Tottenham fengið til sín fjöldan allan af leikmönnum.

Villas-Boas er þakklátur Daniel Levy, stjórnarformanni Tottenham fyrir að styðja við bakið á sér í félagsskiptaglugganum. Tottenham hefur eytt hátt í hundrað milljón punda í leikmenn líkt og Paulinho, Roberto Soldado, Erik Lamela og Christian Eriksen.

„Ég gaf Levy lista af leikmönnum og hann hefur staðið þétt við bakið á mér og eytt stórum upphæðum. Við viljum komast í hóp bestu liðanna og peningurinn sem var til staðar fór í að styrkja liðið. Við vissum að við myndum líklegast missa einn af áhrifamestu leikmönnum okkar í Bale svo við vildum gera liðið sterkara en í fyrra.“

„Eftir að hafa rétt svo misst af sæti í Meistaradeildinni í fyrra fann ég fyrir meiri einbeitingu hjá leikmönnum að ná því í ár. Ég held að við séum á réttri leið, við erum með sterkari hóp af leikmönnum en í fyrra og meira af hæfileikaríkum einstaklingum. Vonandi með sterkari hóp getum við leyft okkur að hvíla leikmenn án þess að vera lakari,“

Villas-Boas býst við að fleiri muni stíga upp á þessu tímabili í fjarveru Bale.

„Við munum sjá meira flæði í liðinu í stað frábærra einstaklings takta frá Gareth. Þetta gefur öðrum leikmönnum möguleika á að stíga upp,“ sagði Villas-Boas.

Lærisveinar Villas-Boas eru í eldlínunni í dag þegar þeir mæta Arsenal í Lundúnarslag af bestu gerð.