Íslenskur vikur á leið til Mars?

Svo gæti farið að íslenskur vikur verði um borð í fyrsta mannaða leiðangrinum til Mars. Íslenskt nýsköpunarfyrirtæki kemur að verkefni þar sem reynt að þróa hagkvæma lausn við fæðu- og súrefnisþörf fyrstu Marsfaranna.

Mannaður leiðangur til Mars verður næsta stóra skref í geimsögu mannkyns. Ferðin tekur um átta mánuði og ljóst er að það þarf nóg af súrefni og næringu fyrir ferðalangana. Vísindamenn reyna nú að finna lausn á þessu vandamáli og ORF líftækni í Grindavík tekur þátt í þessu verkefni.

Síðustu ár hefur ORF líftækni þróað nýstárlega aðferð til að framleiða prótein úr fræjum byggplöntunnar sem síðan eru notuð í snyrtivörur og til líf- og læknisfræðirannsókna vítt og breitt um heiminn. Verkefnið hefur vakið mikla athygli enda eru tilraunir ORF líftækni einstakar.Norska tæknifyrirtækið Lumigreen er á meðal þeirra sem fylgst hefur með störfum ORF og tók á dögunum höndum saman við nýsköpunarfyrirtækið.

Í hátæknigróðurhúsi ORF við Grindavík er nú að finna einstaka tilraun þar sem vatnsræktun byggs fer fram í íslenskum vikri og það undir díóðulömpum.Verkefnið er hluti af langtímaáætlun geimferðastofnana í Bandaríkjunum og Evrópu um plönturæktun í geimnum og er nauðsynlegur liður í fyrirhuguðum leiðangri til rauðu plánetunnar. Díóður, eða LED-ljós, nota margfalt minni orku en hefðbundnir lampar og er því ákjósanleg leið til að næra geimfara.

„Norsararnir hafa gert mjög merkilega tilraunir og uppgötvanir á þessu sviði,“ segir Björn L. Örvar, frkvstj. rannsókna- og vöruþróunarsviðs hjá ORF líftækni. „Þeir hafa viljað athuga hvort að þetta sé raunhæft í praxis hjá okkur og hvort að þetta bjóði upp á frekari rannsóknir í þágu geimvísindanna.“

Niðurstöður verkefnisins gætu orðið til þess að draga úr orkukostnaði hjá ORF líftækni sem og að auka afkastagestu í ræktun á fermetra.„Menn hafa áhuga á að fara einfaldar leiðir, með einföld ræktunarskilyrði með því að nota vikur og engan jarðveg, til að skera úr um hvort að þetta sé hægt í geimnum.“„Við höfum þróað þessa vaxtaþætti fyrir húðvörur, þannig að maður veit aldrei hvernig þetta endar.“

Sp. blm. Þannig að við eigum von á að sjá íslenska vikur á leið til Mars? „Ég vona það,“ segir Björn.