„Ég grét og hugsaði að þetta gæti verið barnaníðingur“

Ung móðir varð fyrir miklu áfalli þegar hún fann myndir af tveggja ára gamalli dóttur sinni á Facebook-síðu ókunnugs manns. Myndirnar hafði hún sett á sína eigin Facebook-síðu skömmu áður.

Guðrún Ósk Valþórsdóttir fékk afar óþægilegt símtal frá föður sínum fyrir um ári síðan, þar sem hann tjáði henni að hann hefði fyrir einskæra tilviljun rekist á Facebook-síðu hjá ókunnugum manni sem hafði mynd af dóttur Guðrúnar sem opnumynd.

Guðrún veit ekkert hver maðurinn er, en  ljóst er að um einhverskonar sýndarveruleika er að ræða þar sem hann lét líta út fyrir að dóttir Guðrúnar sé hans eigin.

Hann hafði á síðunni tvær myndir af litlu stúlkunni auk mynda af að minnsta kosti tveimur öðrum börnum.

„Ég grét náttúrulega fyrst og fór að hugsa um verstu hlutina; að þetta gæti verið barnaníðingur - maður veit aldrei. Ég veit ekki hvort að hann sé hér á landi eða útlöndum - ég veit ekki neitt," segir hún.

Guðrún og fjölskylda hennar tilkynntu síðu mannsins strax til Facebook og var henni lokað í kjölfarið. Það dugði hins vegar ekki til því maðurinn opnaði aðra síðu nokkrum mánuðum síðar þar sem hann notaði myndirnar af dóttur Guðrúnar í sama tilgangi.

Þeirri síðu var einnig lokað, en ekki leið á löngu þar til hann opnaði aðra síðu, þar sem myndirnar er einnig að finna, nú rúmu ári eftir að Guðrún komst á snoðir um málið. Nær ómögulegt er að fjarlægja ljósmyndir af netinu þegar þær eru farnar í dreifingu.

En hvað geta foreldrar gert til að koma í veg fyrir svona aðstæður?

„Ég hvet þá til að læsa öllu. Það er allt í lagi að setja inn myndir af börnunum sínum, en það verður að passa að það sé allt læst. Og geyma það að setja myndir af börnunum í „Cover-photos“ á Facebook, því það er ekki hægt að læsa því og þannig nálgast manneskjan myndir af börnunum,“ segir Guðrún Ósk.