Speglaveggurinn líklega áfram

Allt útlit er fyrir að glerveggurinn á húsi Menntaskólans í Reykjavík fái að standa, en um hann hafa staðið nokkrar deilur. Veggurinn var byggður síðasta sumar, en húsið hafði þá látið verulega á sjá.



Eftir að hann reis gerðu nágrannar hins vegar athugasemdir við að speglun af húsunum í glerveggnum gerði það að verkum að friðhelgi einkalífs þeirra yrði fyrir „óþolandi inngripi“.

Byggingarleyfi fyrir framkvæmdunum var fellt úr gildi í september með ákvörðun úrskurðarnefndar umhverfis- og auðlindamála. Ástæðan var að grenndaráhrifin væru slík að yfirvöldum hefði borið að grenndarkynna framkvæmdirnar.

Málið var því sett í ferli á ný og bárust umsagnir frá íbúum og skipulagsfulltrúa og byggingarfulltrúa. Sjö íbúar sem búa gegnt veggnum sendu inn mótmæli í umsagnarferlinu en eigendur tveggja fasteigna lýstu yfir ánægju með niðurstöðuna.

Í sameiginlegri umsögn skipulagsfulltrúa og byggingarfulltrúa kemur fram að vissulega sé speglun í veggnum og athugað hafi verið hvernig draga megi úr henni. Ýmsar hugmyndir hafi verið reifaðar en engin þeirra sé talin ásættanleg eða raunhæf.

Umsóknin um leyfi var tekin fyrir á fundi umhverfis- og skipulagsráðs Reykjavíkur í síðustu viku, þar sem engar athugasemdir voru gerðar. Henni var vísað til fullnaðarafgreiðslu byggingarfulltrúa og verður líklega afgreidd endanlega á fundi næstkomandi þriðjudag.