Tók engin leyniskjöl með til Rússlands

Bandaríski uppljóstrarinn Edward Snowden segist ekki hafa tekið með sér til Rússlands nein af leyniskjölunum, sem hann hefur verið að leka í fjölmiðla.

Hann segir jafnframt að hvorki rússneskir né kínverskir leyniþjónustumenn geti hafa fengið aðgang að skjölunum, sem lýsa víðtækri njósnastarfsemi bandarísku leyniþjónustunnar.

„Það eru núll prósent líkur á því að Rússar eða Kínverjar hafi fengið nein skjöl,” sagði hann í viðtali við bandaríska dagblaðið New York Times.

Snowden fór huldu höfði í Hong Kong þegar fyrstu lekarnir birtust og hélt síðan til Rússlands, þar sem hann hefur fengið tímabundið hæli.

Bandarísk stjórnvöld saka hann um njósnir, en sjálfur segir hann uppljóstranir sínar efla öryggi Bandaríkjanna, því hann hafi komið af stað nauðsynlegum umræðum um það hversu langt leyniþjónusta Bandaríkjanna eigi að ganga í söfnun upplýsinga.

„Að halda þessari starfsemi áfram með leynd er miklu hættulegra en að ljóstra upp um hana,” segir Snowden.