Heilar kvenna og karla eru mismunandi

Kortlagning boðkerfis heilans hefur sýnt að heilar kvenmanna eru betur hannaðir fyrir samskipti og minni, en heilar karla eru sérhæfðir í skynjun og samhæfingu. Frá þessu er sagt á vef Guardian.

„Vísindamenn skönnuðu nærri 1.000 heila til að staðfesta það sem marga hafði örugglega grunað um árabil. Að greinanlegur munur væri á tengingum heila kvenmanna og karla.“

Að meðaltali voru heilar kvenmanna mikið tengdir á milli vinstra og hægra heilahvela, en tengingar karla gengu meira fram og aftur.

Guardian hefur eftir Regini Verma, einum rannsakenda við Háskólann í Pennsylvania, að henni hefði mest komið á óvart hve mikið rannsóknirnar studdu við gamlar steríótýpur. Að vinstri heilinn væri hannaður fyrir rökhugsun og hægri heilinn fyrir innsæi. „Ef viðfangsefni krefst beggja hæfileika eru konur hentugri í verkið,“ segir Regini.

Þessar niðurstöður fengust úr einni stærstu rannsókn sem gerð hefur verið á heilum karla og kvenna og kortlagningin gefur vísindamönnum betri mynd af hvað telst eðlilegt fyrir hvort kyn á mismunandi aldursstigum.

Niðurstöður rannsóknarinnar voru birtar hér.